தீபாவளி சிறப்பு தள்ளுபடி விற்பனை

நாகர்கோவில்:

தீபாவளியை முன்னிட்டு கோ-ஆப்டெக்ஸ் நிறுவனத்தின் சிறப்பு தள்ளுபடி விற்பனையை மாவட்ட கலெக்டர் அரவிந்த் குத்து விளக்கு ஏற்றி தொடங்கி வைத்தார்.

கோ-ஆப்டெக்ஸ் சிறப்பு விற்பனை

கோ-ஆப்டெக்ஸ் நிறுவனம் சார்பில் ஆண்டுதோறும் தீபாவளி பண்டிகையின்போது தமிழக அரசு வழங்கும் 30 சதவீத சிறப்பு தள்ளுபடி விற்பனை செய்யப்படும். அந்த வகையில் இந்த ஆண்டிற்கான தீபாவளி சிறப்பு தள்ளுபடி விற்பனை நேற்று நாகர்கோவில் அண்ணா பஸ் நிலையத்தின் அருகே உள்ள கோ-ஆப்டெக்ஸ் நிறுவனத்தில் தொடங்கப்பட்டது.

நிகழ்ச்சிக்கு மாவட்ட கலெக்டர் அரவிந்த் மற்றும் நாகர்கோவில் மாநகராட்சி மேயர் மகேஷ் ஆகியோர் தலைமை தாங்கி குத்து விளக்கு ஏற்றி முதல் விற்பனையை தொடங்கி வைத்தனர். பெண்கள் கிறிஸ்தவ கல்லூரி பேராசிரியை பெனாஜோதி முதல் விற்பனையை பெற்றுக் கொண்டார்.

ரூ.4.10 கோடி விற்பனை இலக்கு

அதைத்தொடர்ந்து மாவட்ட கலெக்டர் அரவிந்த் கூறியதாவது:-

தமிழக அரசின் கூட்டுறவு நிறுவனமான கோ-ஆப்டெக்ஸ் கடந்த 87 ஆண்டுகளாக தமிழக கைத்தறி நெசவாளர்கள் உற்பத்தி செய்யும் ரகங்களை கொள்முதல் செய்து இந்தியா முழுவதும் உள்ள கோ-ஆப்டெக்ஸ் விற்பனை நிலையங்கள் மூலமாக விற்பனை செய்து நெசவாளர்களுக்கு தொடர்ந்து வேலை வாய்ப்பினை வழங்கி பேருதவி புரிந்து வருகிறது.

கடந்த தீபாவளி பண்டிகை காலத்தில், கன்னியாகுமரி மாவட்டத்தில் உள்ள 4 கோ-ஆப்டெக்ஸ் விற்பனை நிலையங்களிலும் ரூ.2.25 கோடி விற்பனை செய்யப்பட்டது. இந்த ஆண்டு தீபாவளி பண்டிகைக்கு ரூ.4.10 கோடி விற்பனை இலக்கு நிர்ணயம் செய்யப்பட்டுள்ளது.

சேமிப்பு திட்டம்

மேலும் "கோ-ஆப்டெக்ஸ் நிறுவனம் கனவு நனவு திட்டம்" என்ற சேமிப்பு திட்டத்தினை செயல்படுத்தி வருகிறது. இதில் மாத சந்தா தொகை வாடிக்கையாளர்களிடம் இருந்து பெறப்பட்டு 11-வது மற்றும் 12-வது சந்தா தொகையை கோ-ஆப்டெக்ஸ் நிறுவனத்தில் செலுத்தி மொத்த முதிர்வு தொகைக்கு தேவைப்படும் துணிகளை 20 சதவீதம் அரசு தள்ளுபடியுடன் வழங்கப்பட்டு வருகிறது என்றார்.

நிகழ்ச்சியில், கோ-ஆப்டெக்ஸ் திருநெல்வேலி மண்டல மேலாளர் ராஜேஷ்குமார், முதுநிலை மேலாளர் (தணிக்கை) இசக்கிமுத்து மற்றும் அரசு அதிகாரிகள், வாடிக்கையாளர்கள், ஊழியர்கள் உள்பட பலர் கலந்து கொண்டனர். விழாவுக்கான ஏற்பாடுகளை குமரி மாவட்ட கோ ஆப்டெக்ஸ் விற்பனை நிலைய மேலாளர் பத்மராஜ் செய்திருந்தார்.