மரத்தில் லாரி மோதி டிரைவர் சாவு

நெகமம்

கேரள மாநிலம் பாலக்காடு மாவட்டம் சித்தூரை சேர்ந்தவர் சிவதாஸ்(வயது 58). லாரி டிரைவர். இவர் அரியலூரில் இருந்து சிமெண்டு ஏற்றி கொண்டு சித்தூர் நோக்கி வந்து கொண்டு இருந்தார். நெகமம் அருகே உள்ள சுந்தரகவுண்டனூர் பகுதியில் சென்ற போது திடீரென்று கட்டுப்பாட்டை இழந்த லாரி சாலையோரத்தில் இருந்த மரத்தில் மோதியது. இதில் படுகாயமடைந்த அவரை அக்கம்பக்கத்தினர் மீட்டு சிகிச்சைக்காக பொள்ளாச்சி அரசு ஆஸ்பத்திரிக்கு அனுப்பி வைத்தனர். அங்கு அவரை பரிசோதனை செய்த டாக்டர்கள் ஏற்கனவே இறந்து விட்டதாக தெரிவித்தனர். இதுகுறித்து தகவல் அறிந்த நெகமம் போலீசார் விரைந்து வந்து விசாரணை நடத்தினார்கள். லாரி ஓட்டும் போது தூக்க கலக்கத்தில் மரத்தில் மோதியது தெரியவந்தது.