கரடி தாக்கி முதியவர் படுகாயம்

கோத்தகிரி,

கோத்தகிரி அருகே உள்ள கெங்கரை, குடகூர் பழங்குடியின குடியிருப்பு பகுதியை சேர்ந்தவர் சூனன் (வயது 63). இருளர் பழங்குடியினத்தை சேர்ந்த கூலித்தொழிலாளி. இவர் இன்று காலை 7 மணியளவில் தனது வீட்டிற்கு வெளியே வந்துள்ளார். அப்போது வீட்டிற்கு முன்புறமாக இருந்த காபி மரத்திற்கு பின்னால் மறைந்து நின்றுக்கொண்டிருந்த கரடி ஒன்று திடீரென சூனன் மீது பாய்ந்து தாக்கியது. மேலும் அவரது கை மற்றும் காலில் கடித்து காயப்படுத்தியது. இதனால் வலி தாங்க முடியாமல் அலறிய அவரது சத்தம் கேட்டு அருகில் இருந்தவர்கள் ஓடி வந்து தீப்பந்தத்தை காட்டி கரடியை விரட்டியடித்தனர். பின்னர் கரடி தாக்கியதில் பலத்த காயமடைந்த சூனனை மீட்டு சிகிச்சைக்காக கோத்தகிரி அரசு மருத்துவமனைக்கு அனுப்பி வைத்தனர். அங்கு அவருக்கு முதலுதவி சிகிச்சை அளிக்கப்பட்டது. பின்னர் அவர் மேல் சிகிச்சைக்காக கோவை அரசு ஆஸ்பத்திரிக்கு அனுப்பி வைக்கப்பட்டார். இந்த சம்பவம் குறித்து கோத்தகிரி போலீசார் மற்றும் வனத்துறையினர் விசாரணை மேற்கொண்டு வருகின்றனர்.