அரசு பஸ் மோதி மூதாட்டி பலி

அரியலூர் மாவட்டம் உடையார்பாளையம் அருகே நாச்சியார்பேட்டை கிராமத்தை சேர்ந்தவர் கணேசன் மனைவி லட்சுமி (வயது 80), கூலி தொழிலாளி. இவர் நேற்று இரவு திருச்சி-சிதம்பரம் தேசிய நெடுஞ்சாலையில் நாச்சியார்பேட்டை பாலம் அருகே உள்ள தனது வீட்டிற்கு செல்வதற்காக சாலையின் இடது பக்கமாக நடந்து சென்று கொண்டிருந்தார். அப்போது ஜெயங்கொண்டத்தில் இருந்து அரியலூர் நோக்கி வந்த அரசு பஸ் எதிர்பாராதவிதமாக மூதாட்டி மீது மோதியது. இதில் படுகாயம் அடைந்த அவர் சம்பவ இடத்திலேயே பரிதாபமாக இறந்தார். இதுகுறித்து தகவல் அறிந்த உடையார்பாளையம் போலீசார் சம்பவ இடத்துக்கு விரைந்து சென்று மூதாட்டி லட்சுமியின் உடலை கைப்பற்றி பிரேத பரிசோதனைக்காக ஜெயங்கொண்டம் அரசு மருத்துவமனைக்கு அனுப்பி வைத்தனர். மேலும் இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.