பள்ளி மாணவ, மாணவிகளுக்கு கட்டுரை, ஒவிய போட்டி

நாடு முழுவதிலும் பணியின் போது வீர, தீர செயல்புரிந்து உயிர் நீத்த காவலர்களின் தியாகத்தை நினைவு கூறும் வகையில் ஒவ்வொரு ஆண்டும் அக்டோபர் மாதம் 21-ந் தேதி காவலர் நினைவு நாள் அனுசரிக்கப்படுகிறது. இது தொடர்பாக காவல்துறையினரின் வீரதீரம் மற்றும் கடமைகளை பொதுமக்கள் மற்றும் மாணவர்களுக்கு பறைசாற்றும் விதமாக 9 முதல் 12-ம் வகுப்பு வரை பயிலும் மாணவ-மாணவிகளுக்கு திருப்பத்தூர் அரசு ஆண்கள் மேல்நிலைப் பள்ளியில் மாநில வளர்ச்சியில் காவல் துறையின் பங்கு எனும் தலைப்பில் கட்டுரை போட்டியும், கடமை எனும் தலைப்பில் ஓவியப்போட்டியும் நடைபெற்றது.

ஒவ்வொரு தலைப்பிலும் 50 மாணவ- மாணவிகள் பங்கேற்றனர். வெற்றி பெற்ற மாணவ, மாணவிகளுக்கு மாவட்ட போலீஸ் சூப்பிரண்டு பாலகிருஷ்ணன் பரிசுகளை வழங்கி பேசினார். நிகழ்ச்சியில் போலீஸ் இன்ஸ்பெக்டர்கள், சப்-இன்ஸ்பெக்டர்கள், மாணவ, மாணவிகள் கலந்து கொண்டனர்.