தவறி விழுந்த மெக்கானிக் சாவு

நத்தம் அருகே உள்ள சொறிப்பாறைபட்டியை சேர்ந்தவர் அழகர்சாமி (வயது 38). மெக்கானிக். நேற்று முன்தினம் இரவு இவர், அங்குள்ள ஒரு ஒட்டலில் சாப்பிட்டு விட்டு தனது வீட்டுக்கு மோட்டார் சைக்கிளில் சென்று கொண்டிருந்தார். நத்தம் மூன்று லாந்தர் பகுதியில் வந்தபோது, எதிரே வந்த ஒரு மாட்டின் மீது மோட்டார் சைக்கிள் மோதியது.

இதில் நிலைதடுமாறி கீழே விழுந்த அழகர்சாமி, ரத்த வெள்ளத்தில் சம்பவ இடத்திலேயே பரிதாபமாக இறந்தார். இதுகுறித்து தகவல் அறிந்த நத்தம் போலீசார் சம்பவ இடத்துக்கு விரைந்தனர். பின்னர் அழகர்சாமியின் உடலை கைப்பற்றி, பிரேத பரிசோதனைக்காக நத்தம் அரசு மருத்துவமனைக்கு அனுப்பி வைத்தனர். மேலும் இது தொடர்பாக போலீஸ் சப்-இன்ஸ்பெக்டர் சரவணன் வழக்குப்பதிவு செய்து விசாரணை நடத்தி வருகின்றனர்.