மின்சாரம் பாய்ந்து விவசாயி சாவு

தஞ்சை கோரிக்குளம் புதுத்தெருவை சேர்ந்தவர் குணசேகரன்(வயது 45). விவசாயியான இவர் புதிய வீடு கட்டி வந்தார். சம்பவத்தன்று இவர் வீட்டின் கட்டுமான பணிக்காக கீழ் தளத்தில் கடப்பாரையால் பள்ளம் தோண்டிக்கொண்டு இருந்தார்.

அப்போது கீழே கிடந்த மின்சார வயர் மீது கடப்பாரை பட்டது. இதில் மின்சாரம் பாய்ந்து குணசேகரன் தூக்கி வீசப்பட்டார்.

பலத்த காயம் அடைந்த அவரை அக்கம், பக்கத்தினர் மீட்டு சிகிச்சைக்காக தஞ்சை மருத்துவக்கல்லூரி ஆஸ்பத்திரிக்கு அனுப்பி வைத்தனர். அங்கு சிகிச்சை பலனின்றி குணசேகரன் பரிதாபமாக இறந்தார். இது குறித்து தஞ்சை தாலுகா போலீசார் வழக்குப்பதிவு செய்து விசாரணை நடத்தி வருகின்றனர்.