மோட்டார் சைக்கிள் மீது கார் மோதி தந்தை-மகன் பலி

சோளிங்கர்

சோளிங்கர் அருகே மோட்டார் சைக்கிள் மீது கார் மோதிய விபத்தில் தந்தை-மகன் பலியாகினர்.

கார் மோதல்

திருவள்ளூர் மாவட்டம் ஆர்.கே.பேட்டை ஒன்றியம் மீசரகண்டாபுரம் பகுதியைச் சேர்ந்தவர் விஜயன் (வயது 40). இவர் அதே கிராமத்தில் துப்புரவு தொழிலாளியாக வேலை செய்து வந்தார். இவரது மனைவி சுமதி. மகள் பிரியா (10) மகன் தட்சன் (7)

நேற்று மாலை விஜயன் தனது மகள் பிரியா மற்றும் மகன் தட்சன் ஆகியோரை மோட்டார் சைக்கிளில் ஏற்றிக்கொண்டு ராணிப்பேட்டை மாவட்டம் சோளிங்கர் அருகே குண்ணத்தூர் கிராமத்தில் உள்ள உறவினர் வீட்டிற்கு சென்று கொண்டிருந்தார்.

ஐய்பேடு பஸ் நிறுத்தம் அருகே சென்றபோது எதிரே வந்த கார், விஜயன் ஓட்டிச் சென்ற மோட்டார் சைக்கிள் மீது நேருக்கு நேர் பயங்கரமாக மோதியது. இந்த விபத்தில் விஜயன் மற்றும் அவரது மகன் தட்சன் ஆகியோர் சம்பவ இடத்திலேயே பரிதாபமாக உயிரிழந்தனர்.

படுகாயமடைந்த பிரியாவை அக்கம்பக்கத்தினர் மீட்டு 108 ஆம்புலன்ஸ் மூலம் சோளிங்கர் அரசு மருத்துவமனையில் சிகிச்சைக்காக சேர்த்தனர்.

விசாரணை

தகவலறிந்த சோளிங்கர் போலீசார் சம்பவ இடத்திற்கு விரைந்து சென்று 2 பேர் உடல்களையும் கைப்பற்றி பிரேத பரிசோதனைக்காக சோளிங்கர் அரசு மருத்துவமனைக்கு அனுப்பி வைத்தனர்.

இதுகுறித்து வழக்கு பதிவு செய்த போலீசார் கார் டிரைவர் தமிழ்ச்செல்வனை கைது செய்து விசாரணை நடத்தி வருகின்றனர். விபத்தில் தந்தை-மகன் உயிரிழந்த சம்பவம் சோளிங்கர் பகுதியில் சோகத்தை ஏற்படுத்தியுள்ளது.