பெண் ஐ.பி.எஸ். அதிகாரி ஒருவருக்கு முன்னாள் சிறப்பு டி.ஜி.பி. பாலியல் தொல்லை அளித்ததாக தொடரப்பட்ட வழக்கு விசாரணை விழுப்புரம் தலைமை குற்றவியல் நீதிமன்றத்தில் நடந்து வருகிறது. இவ்வழக்கின் புகார்தாரரான பெண் ஐ.பி.எஸ். அதிகாரியிடம் முன்னாள் சிறப்பு டி.ஜி.பி. தரப்பு வக்கீல் குறுக்கு விசாரணையை நிறைவு செய்த நிலையில் தற்போது அரசு தரப்பு சாட்சிகளிடம் விசாரணை நடந்து வருகிறது. இந்நிலையில் நேற்று இவ்வழக்கு விசாரணைக்கு வந்தது. அப்போது முன்னாள் சிறப்பு டி.ஜி.பி. ஆஜரானார். செங்கல்பட்டு மாவட்ட முன்னாள் போலீஸ் சூப்பிரண்டு ஆஜராகவில்லை. மேலும் இவ்வழக்கில் நேற்று அரசு தரப்பு சாட்சிகளான புகார்தாரரின் கணவரான ஐ.ஏ.எஸ். அதிகாரியும் மற்றும் இவரது தந்தையும் நேரில் ஆஜராகினர். ஐ.ஏ.எஸ். அதிகாரி ஏற்கனவே இவ்வழக்கு தொடர்பாக சாட்சியம் அளித்து முடித்த நிலையில் அவரிடம் முன்னாள் சிறப்பு டி.ஜி.பி. தரப்பின் குறுக்கு விசாரணையும் தொடங்கப்பட்டது. அந்த குறுக்கு விசாரணை நிறைவடையாததால் நேற்று மீண்டும் அவரிடம் முன்னாள் சிறப்பு டி.ஜி.பி. தரப்பு வக்கீல் குறுக்கு விசாரணை செய்தார். இந்த விசாரணை முடிவடைந்த பின்னர் ஐ.ஏ.எஸ். அதிகாரியின் தந்தை, இவ்வழக்கு தொடர்பாக சாட்சியம் அளித்தார். அப்போது அவரிடம் முன்னாள் சிறப்பு டி.ஜி.பி. தரப்பினர் குறுக்கு விசாரணை செய்தனர். இதையடுத்து இவ்வழக்கை விசாரித்த நீதிபதி புஷ்பராணி, இதன் அடுத்தகட்ட விசாரணையை வருகிற 18-ந் தேதிக்கு (திங்கட்கிழமை) ஒத்திவைத்ததோடு அன்றைய தினம் அரசு தரப்பு 28-வது சாட்சியான அப்போதைய கடலூர் மாவட்ட போலீஸ் சூப்பிரண்டும் தற்போது சேலம் மாவட்ட போலீஸ் சூப்பிரண்டாக பணியாற்றி வருபவருமான ஸ்ரீஅபினவ், 29-வது சாட்சியான அப்போதைய பெரம்பலூர் மாவட்ட போலீஸ் சூப்பிரண்டும், தற்போது சென்னை மயிலாப்பூர் துணை ஆணையருமான திஷாமிட்டல் ஆகிய இருவரும் நேரில் ஆஜராகும்படி உத்தரவிட்டார்.