தென்பெண்ணை ஆற்றில் வெள்ளப்பெருக்கு

கிருஷ்ணகிரி அணையில் இருந்து நேற்று மாலை வினாடிக்கு 13,508 கனஅடி தண்ணீர் திறந்து விடப்பட்டுள்ளதால் தென்பெண்ணை ஆற்றில் வெள்ளப்பெருக்கு ஏற்பட்டுள்ளது. இதனால் 5 மாவட்டங்களுக்கு வெள்ள அபாய எச்சரிக்கை விடுக்கப்பட்டுள்ளது.

தொடர் மழை

கிருஷ்ணகிரி மாவட்டத்தில் கடந்த சில நாட்களாக தென்பெண்ணை ஆற்று நீர்ப்பிடிப்பு பகுதிகளில் தொடர்ந்து கனமழை பெய்து வருகிறது. இதனால் கிருஷ்ணகிரி அணைக்கு நீர்வரத்து அதிகரித்து வருகிறது. அதன்படி நேற்று முன்தினம் வினாடிக்கு 6,774 கனஅடி தண்ணீர் வந்து கொண்டு இருந்தது. இந்த நீர்வரத்து நேற்று காலை 6 மணி அளவில் வினாடிக்கு 7,577 கனஅடியாக அதிகரித்தது.

இதனிடையே அணைக்கு நீர்வரத்து படிப்படியாக அதிகரிக்க தொடங்கியது. இதனால் அணையில் இருந்து தென்பெண்ணை ஆற்றில் திறந்து விடப்படும் தண்ணீரின் அளவும் அதிகரிக்கப்பட்டது. அதன்படி காலை 10 மணி நிலவரப்படி வினாடிக்கு 6,832 கனஅடி திறந்து விடப்பட்டது. இந்த தண்ணீர் திறப்பால் மாலை 6 மணி நிலவரப்படி வினாடிக்கு 13,508 கனஅடியாக அதிகரித்தது. அணையில் இருந்து அதிக அளவில் தண்ணீர் பிரதான மதகுகள் வழியாக திறந்துவிடப்பட்டுள்ளதால் தென்பெண்ணை ஆற்றில் வெள்ளம் பெருக்கெடுத்து ஓடியது.

வெள்ள அபாய எச்சரிக்கை

மேலும், அணை தரைப்பாலம் தண்ணீரில் மூழ்கியதால், அவ்வழியே செல்ல சுற்றுலா பயணிகளுக்கு தடை விதிக்கப்பட்டு உள்ளது. மேலும், தென்பெண்ணை ஆற்றில் வெள்ளப்பெருக்கு ஏற்பட்டுள்ளதால், கிருஷ்ணகிரி, தர்மபுரி, திருவண்ணமலை, விழுப்புரம், கடலூர் உள்ளிட்ட 5 மாவட்டங்களில் கரையோரம் வசிக்கும் மக்களுக்கு வெள்ள அபாய எச்சரிக்கை விடுக்கப்பட்டுள்ளது.

கரையோரம் தாழ்வான பகுதிகளில் வசிக்கும் மக்கள் பாதுகாப்பான இடங்களுக்கு செல்லுமாறு பொதுப்பணித்துறையினர் அறிவுறுத்தி உள்ளனர். மேலும், பொதுப்பணித்துறை, வருவாய்த்துறையினர் மற்றும் காவல்துறையினர் மூலம் கண்காணிப்பு பணிகளும் தீவிரப்படுத்தப்பட்டுள்ளது. தொடர்ந்து பெய்யும் மழையால், அணைக்கு நீர்வரத்து அதிகரிக்கும் என பொதுப்பணித்துறை அலுவலர்கள் தெரிவித்தனர்.