சேந்தமங்கலம் அருகே மொபட்-மோட்டார் சைக்கிள் நேருக்குநேர் மோதல்; விவசாயி பலி

சேந்தமங்கலம்:

சேந்தமங்கலம் அருகே உள்ள நஞ்சுண்டாபுரத்தை சேர்ந்தவர் ராமசாமி(வயது 75), விவசாயி. இவர் நேற்று காளப்பநாயக்கன்பட்டியில் இருந்து காரவள்ளிக்கு செல்லும் பிரதான சாலையில் மொபட்டில் சென்று கொண்டிருந்தார். ஆத்துக்குட்டி பள்ளம் என்ற இடத்தின் அருகே சென்ற போது அவருடைய மொபட்டும், எதிரே வந்த மோட்டார் சைக்கிளும் நேருக்கு நேர் மோதியது.

இதில் படுகாயம் அடைந்த ராமசாமி சம்பவ இடத்திலேயே பரிதாபமாக இறந்தார். இதுகுறித்து தகவல் கிடைத்ததும் சேந்தமங்கலம் போலீசார் சம்பவ இடத்துக்கு விரைந்து சென்றனர். பின்னர் ராமசாமியின் உடலை மீட்டு பிரேத பரிசோதனைக்காக சேந்தமங்கலம் அரசு ஆஸ்பத்திரிக்கு அனுப்பி வைத்தனர். மேலும் இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.