3 பேர் மீது குண்டர் சட்டம் பாய்ந்தது

பணம் பறிப்பு, கஞ்சா விற்பனை உள்ளிட்ட வழக்குகளில் தொடர்புடைய 3 பேர் மீது குண்டர் சட்டம் பாய்ந்தது.

செல்போன் பறிப்பு

திருச்சி அரியமங்கலம் ஜோதிநகரை சேர்ந்த சிறுவனை கடித்து காயப்படுத்தியதாக கடந்த மாதம் 17-ந் தேதி சிறுவனின் தாயார் கொடுத்த புகாரில் போலீசார் வழக்குப்பதிவு செய்து ரவிச்சந்திரன் (வயது 27) என்பவரை கைது செய்து சிறையில் அடைத்தனர். ஸ்ரீரங்கம் கொள்ளிடக்கரை முருகன் கோவில் அருகே மோட்டார் சைக்கிளில் சென்ற ஒருவரிடம் கத்தியை காட்டி மிரட்டி செல்போன் பறித்ததாக கடந்த ஜூன் மாதம் 23-ந் தேதி கொடுத்த புகாரில் வழக்குப்பதிவு செய்து, சாந்தனு (34) என்பவரை கைது செய்து சிறையில் அடைத்தனர்.

விசாரணையில் ரவிச்சந்திரன் மீது அரியமங்கலம் போலீஸ் நிலையத்தில் ஒருவரை ஆபாசமாக திட்டிய வழக்கு உள்பட 3 வழக்குகளும், சாந்தனு மீது வங்கியில் இருந்து பணம் எடுத்து வரும் வயதானவர்களை குறி வைத்து பணம் பறித்ததாக ஸ்ரீரங்கம் போலீஸ் நிலையத்தில் 2 வழக்குகளும் பல்வேறு போலீஸ் நிலையங்களில் நிலுவையில் இருப்பது தெரியவந்தது. எனவே ரவிச்சந்திரன், சாந்தனு ஆகியோரின் குற்ற நடவடிக்கையை தடுக்கும் பொருட்டு, அவர்களை குண்டர் சட்டத்தில் கைது செய்ய போலீஸ் கமிஷனர் கார்த்திகேயன் உத்தரவிட்டார்.

குண்டர் சட்டம்

இதையடுத்து திருச்சி சிறையில் அடைக்கப்பட்டு இருந்த 2 பேரிடமும் குண்டர் சட்டத்தில் கைது செய்ததற்கான உத்தரவு நகல் வழங்கப்பட்டது.

இதேபோல் சோமரசம்பேட்டை போலீஸ் சரகம் தாயனூர் மேலக்காடு பகுதியை சேர்ந்தவர் செல்வம் என்ற தீ செல்வம் (50). இவர் மீது ராம்ஜிநகர், இனாம்குளத்தூர், சோமரசம்பேட்டை ஆகிய போலீஸ் நிலையங்களில் கஞ்சா விற்பனை, சூதாட்டம், திருட்டு வழக்குகள் உள்ளன. இந்த நிலையில் சோமரசம்பேட்டை பகுதியில் கஞ்சா விற்றதாக சோமரசம்பட்டை போலீசாரால் கைது செய்யப்பட்டு திருச்சி மத்திய சிறையில் அடைக்கப்பட்டார், இந்நிலையில் இவர் மீது குண்டர்தடுப்பு சட்டத்தின் கீழ் நடவடிக்கை எடுக்க திருச்சி மாவட்ட போலீஸ் சூப்பிரண்டு பரிந்துரை செய்ததன் பேரில் திருச்சி மாவட்ட கலெக்டர் பிரதீப் குமார் அதற்கான உத்தரவை பிறப்பித்தார். பின்னர் குண்டர் சட்டத்தில் கைது செய்ததற்கான உத்தரவு நகல் திருச்சி மத்திய சிறையில் உள்ள செல்வத்திடம் வழங்கப்பட்டது.