கஞ்சா விற்றவர் கைது

அரியலூர் நகர போலீஸ் சப்-இன்ஸ்பெக்டர் பார்த்திபன், போலீசாருடன் ரோந்து பணியில் ஈடுபட்டார். அப்போது மார்க்கெட் தெருவில் உள்ள அரசு மேல்நிலைப்பள்ளி அருகில் சந்தேகத்திற்கு இடமாக நின்று கொண்டிருந்த ஒரு வாலிபரை பிடித்து விசாரணை நடத்தினர். அப்போது அவர் முன்னுக்கு பின் முரணாக பதில் அளித்தார். இதனால் சந்தேகமடைந்த போலீசார், அவரை போலீஸ் நிலையத்திற்கு அழைத்து சென்று தீவிர விசாரணை மேற்கொண்டனர். இதில் அவர் பெரம்பலூர் மாவட்டம், கொளத்தூர் கிராமத்தை சேர்ந்த மகாலிங்கம் என்பவரது மகன் பிரசாந்த் (வயது 30) என்பதும், அவர் கஞ்சா விற்றதும் தெரியவந்தது. இதையடுத்து அவரிடம் இருந்து 450 கிராம் கஞ்சா பொட்டலங்கள் கைப்பற்றப்பட்டன. இது குறித்து போலீசார் வழக்குப்பதிவு செய்து, அவரை கைது செய்து கோர்ட்டில் ஆஜர்படுத்தி அரியலூர் கிளை சிறையில் அடைத்தனர்.