புனித வெள்ளி சிறப்பு பிரார்த்தனை

கோவை

புனித வெள்ளியையொட்டி கோவையில் உள்ள கிறிஸ்தவ ஆலயங்களில் நேற்று புனித வெள்ளி சிறப்பு பிரார்த்தனை நடந்தது. இதில் ஏராளமான கிறிஸ்தவர்கள் பங்கேற்றனர்.

புனித வெள்ளி

ஏசு கிறிஸ்து சிலுவையில் அறையப்பட்ட நாளை புனித வெள்ளியாகவும், அவர் உயிர்த்தெழுந்த நாளை ஈஸ்டர் பண்டிகையாகவும் கிறிஸ்தவர்கள் கொண்டாடி வருகிறார்கள். அதன்படி நேற்று புனித வெள்ளி என்பதால் கிறிஸ்தவ ஆலயங்களில் சிறப்பு பிரார்த்தனை நடந்தது.

கோவை மாவட்டத்தில் உள்ள அனைத்து கிறிஸ்தவ ஆலயங்களிலும் நேற்று சிறப்பு பிரார்த்தனை நடந்தது. கோவை பெரியக்கடை வீதியில் உள்ள புனித மைக்கேல் ஆலயத்தில் கோவை மறைமாவட்ட ஆயர் தாமஸ் அக்குவினாஸ் தலைமையில் சிறப்பு பிரார்த்தனை நடந்தது.

சிலுவை பாதை ஊர்வலம்

இந்த பிரார்த்தனையின்போது ஆலய வளாகத்தில் சிலுவை பாதை ஊர்வலமும் நடந்தது. இதில் 14 இடங்களில் நின்று பாடல்களை பாடியும், பிரார்த்தனை செய்தபடியும் தியானித்தனர். அதுபோன்று கோவை உக்கடத்தில் உள்ள புனித செபஸ்தியார் ஆலயத்தில் சிலுவை பாதை வழிபாடு நடந்தது.

இதில் கலந்து கொண்ட கிறிஸ்தவர்கள் சிறிய அளவிலான சிலுவைகளை தூக்கியபடி ஊர்வலமாக சென்றனர்.

அதுபோன்று காட்டூர் கிறிஸ்து அரசர் ஆலயம், புலியகுளம் புனித அந்தோணியார் ஆலயம், சவுரிபாளையம் புனித சவேரியார் ஆலயம், கோவை புதூர் குழந்தை ஏசு ஆலயம், போத்தனூர் புனித சூசையப்பர் ஆலயம் உள்பட அனைத்து கிறிஸ்தவ ஆலயங்களிலும் சிறப்பு பிரார்த்தனை நடந்தது.

சி.எஸ்.ஐ. ஆலயம்

மேலும் கோவை திருச்சி ரோட்டில் உள்ள சி.எஸ்.ஐ. கிறிஸ்துநாதர் ஆலயத்தில் சபை குரு ராஜேந்திர குமார், காந்திபுரம் சி.எஸ்.ஐ. கிறிஸ்துநாதர் ஆலயத்தில் டேவிட் பர்னபாஸ், உப்பிலிபாளையம் சிக்னலில் உள்ள இம்மானுவேல் ஆலயத்தில் பிரின்ஸ் கால்வின், ரத்தினபுரி தூய பேதுரு ஆலயத்தில் விக்டர் பிரேம் குமார், கணபதி வ.உ.சி. நகரில் உள்ள சி.எஸ், ஐ. கிறிஸ்துநாதர் ஆலயத்தில் ரிச்சர்டு ஜெயக்குமார் ஆகியோர் தலைமையிலும், கோவைப்புதூர், மதுக்கரை, மத்வராயபுரம் சி.எஸ்.ஐ.ஆலயங்களிலும்சிறப்பு பிரார்த்தனை நடந்தது.

இந்த பிரார்த்தனையின்போது ஏசு கிறிஸ்து சிலுவையில் அறையப்பட்டபோது கூறிய 7 வார்த்தைகள் குறித்து தியானிக்கப்பட்டது.கோவை கணபதியில் உள்ள ஐ.பி.ஏ. ஆலயத்தில் பாஸ்டர் டேவிட் பிரகாசம் தலைமையில் சிறப்பு பிரார்த்தனை நடந்தது. இதுதவிர கோவை மாவட்டத்தில் உள்ள அனைத்து கத்தோலிக்க, சி.எஸ்.ஐ., பெந்தெகொஸ்தே ஆலயங்களில் அந்தந்த சபை பாஸ்டர்கள் தலைமையிலும் சிறப்பு பிரார்த்தனை நடந்தது. இதில் ஏராளமான கிறிஸ்தவர்கள் கலந்து கொண்டனர்.

ஈஸ்டர் பண்டிகை

நாளை (ஞாயிற்றுக்கிழமை) ஈஸ்டர் பண்டிகையை முன்னிட்டு காலையில் அனைத்து கிறிஸ்தவ ஆலயங்களிலும் சிறப்பு பிரார்த்தனை நடைபெறுகிறது.