வீடு புகுந்து ரூ.1½ லட்சம் நகை, பணம் திருட்டு

செஞ்சி

செஞ்சி அருகே உள்ள வரிக்கல் என்ற ஊரை சேர்ந்தவர் சகாதேவன்(வயது 65). இவர் நேற்று முன்தினம் காலையில் வீட்டை பூட்டி விட்டு சாவியை ஜன்னல் ஓரம் வைத்துவிட்டு நிலத்துக்கு சென்றார். பின்னர் மாலையில் திரும்பி வந்து பார்த்தபோது வீடு பூட்டி இருந்தது. ஆனால் உள்ளே சென்று பார்த்தபோது பீரோ கதவுகள் திறந்து இருந்தது. அதில் இருந்த 3 பவுன் சங்கிலி, 250 கிராம் வெள்ளித்தட்டு, ரூ.48,000 ரொக்கம் ஆகியவற்றை காணவில்லை. இதன் மதிப்பு சுமார் ரூ.1½ லட்சம் இருக்கும் என கூறப்படுகிறது.

விசாரணையில் யாரோ மர்ம நபர் ஜன்னலில் வைத்திருந்த சாவியை எடுத்து கதவை திறந்து பீரோவில் இருந்த நகை, பணத்தை திருடிச்சென்றது தெரியவந்தது. இது குறித்து சகாதேவன் கொடுத்த புகாரின் பேரில் அனந்தபுரம் போலீசார் வழக்குப்பதிவு செய்து நகை, பணத்தை திருடிச்சென்ற மர்ம நபரை வலைவீசி தேடி வருகிறார்கள்.