அரியலூரில் இன்று 5 மையங்களில் 'நீட்' தேர்வு-1,994 பேர் எழுதுகிறார்கள்

மருத்துவ படிப்புக்கான நுழைவு தேர்வான 'நீட்' தேர்வு இன்று (ஞாயிற்றுக்கிழமை) நாடு முழுவதும் நடைபெறுகிறது. கடந்த கல்வி ஆண்டு வரை அரியலூர் மாவட்டத்தில் 'நீட்' தேர்வு எழுத தேர்வு மையங்கள் இல்லாத நிலையில், இந்த ஆண்டு மாணவ-மாணவிகளின் கோரிக்கையை ஏற்று அரியலூர் மாவட்டத்தில் 'நீட்' தேர்வு நடத்துவதற்கு 5 தேர்வு மையங்கள் ஏற்படுத்தப்பட்டுள்ளன. அரியலூர் மாவட்டத்தில் 'நீட்' தேர்வு நடைபெறும் மையங்கள், தேர்வு எழுதம் மாணவ-மாணவிகளின் எண்ணிக்கை விவரம் வருமாறு:-

அரியலூர் மான்போர்ட் மெட்ரிக் பள்ளி, கல்லக்குடி டால்மியா வித்யா மந்திர் பள்ளி, தாமரைக்குளம் வித்யா மந்திர் பள்ளியில் தலா 360 மாணவ-மாணவிகளும், கீழப்பழுவூர் விநாயகா பப்ளிக் பள்ளியில் 720 மாணவ-மாணவிகளும், கீழப்பழுவூர் சுவாமி மெட்ரிக் பள்ளியில் 194 மாணவ-மாணவிகளும் என மொத்தம் 1,994 பேர் 'நீட்' தேர்வு எழுதவுள்ளனர். இதனால் அந்த தேர்வு மையங்களில் முன்னேற்பாடு பணிகள் அனைத்தும் மேற்கொள்ளப்பட்டு மாணவ-மாணவிகள் தேர்வு எழுத தயார் நிலையில் உள்ளது குறிப்பிடத்தக்கது.