வெவ்வேறு விபத்துகளில் வாலிபர் உள்பட 2 பேர் பலி

சரக்குவேன் மோதல்

ஆண்டிப்பட்டி அருகே உள்ள கன்னியப்பபிள்ளைபட்டி கிராமத்தை சேர்ந்தவர் சதீஷ்குமார் (வயது 24). இவரது தாய் உடல் நிலை சரியில்லாமல் தேனி அரசு மருத்துவ கல்லூரி மருத்துவமனையில் அனுமதிக்கப்பட்டுள்ளார். நேற்று இவரை பார்ப்பதற்காக சதீஷ்குமார் மருத்துவமனைக்கு மோட்டார்சைக்கிளில் சென்று கொண்டிருந்தார்.

ஆண்டிப்பட்டி-தேனி மெயின் ரோட்டில் சக்கம்பட்டி பகுதியில் அவர் வந்து கொண்டிருந்தார். அப்போது எதிர்பாராதவிதமாக முன்னால் சென்ற பஸ் மீது மோட்டார்சைக்கிள் மோதியது. இதில் கீேழ விழுந்த அவர் மீது எதிரே வந்த சரக்குவேன் மோதியது. இந்த விபத்தில் தூக்கி வீசப்பட்டதில் அவர் படுகாயமடைந்தார். இதுகுறித்து தகவல் அறிந்த ஆண்டிப்பட்டி ேபாலீசார் சதீஷ்குமாரை மீட்டு சிகிச்சைக்காக தேனி அரசு மருத்துவ கல்லூரி மருத்துவமனைக்கு அனுப்பி வைத்தனர்.

2 பேர் பலி

அங்கு பரிசோதனை செய்த டாக்டர்கள் அவர் வரும் வழியிலேயே இறந்ததாக தெரிவித்தனர். இதுகுறித்து போலீசார் சரக்கு வேன் டிரைவரான கடமலைக்குண்டு பகுதியை சேர்ந்த விஜய் (26) மீது வழக்குப்பதிவு செய்து விசாரணை நடத்தி வருகின்றனர்.

போடி அருகே உள்ள குப்பனாசாரிபட்டி திருவள்ளுவர் தெருவை சேர்ந்தவர் பார்த்திபன். இவர், போடி-தேவாரம் சாலையில் சங்கராபுரம் அருகே மோட்டார்சைக்கிளில் சென்று கொண்டிருந்தார். எதிரே சிந்தலைச்சேரியை சேர்ந்த ஜேம்ஸ்செல்வன் என்பவர் மோட்டார்சைக்கிளில் வந்தாா். அப்போது எதிர்பாராதவிதமாக 2 மோட்டார்சைக்கிள்களும் நேருக்குநேர் மோதின. இந்த விபத்தில் தூக்கி வீசப்பட்ட 2 பேரும் படுகாயமடைந்தனர்.

தகவல் அறிந்து சம்பவ இடத்திற்கு வந்த போடி தாலுகா போலீசார் அவர்களை மீட்டு சிகிச்சைக்காக தேனி அரசு மருத்துவ கல்லூரி மருத்துவமனைக்கு அனுப்பி வைத்தனர். அங்கு சிகிச்சை பலனின்றி பார்த்திபன் பரிதாபமாக இறந்தார். ஜேம்ஸ்செல்வன் சிகிச்சை பெற்று வருகிறார். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.