ஈரோடு மாவட்டத்தில் லியோ திரைப்படத்துக்கு கட்டுப்பாடு விதிக்கப்பட்டு உள்ளது.

லியோ திரைப்படம்

நடிகர் விஜய் நடித்து உள்ள லியோ திரைப்படம் நாளை (வியாழக்கிழமை) வெளியாகிறது. இந்த திரைப்படத்தை நாளை முதல் வருகிற 24-ந் தேதி வரை ஒரு நாளைக்கு அதிகபட்சம் 5 காட்சிகள் மட்டும் திரையிட வேண்டும் என்று அரசு உத்தரவிட்டு உள்ளது. அதன்படி ஈரோடு மாவட்டத்தில் உள்ள தியேட்டர்களில் தொடக்க காட்சி காலை 9 மணிக்கும், கடைசி காட்சியாக நள்ளிரவு 1.30 மணிஅளவில் முடிவடையும் வகையில் திரைப்படத்தை திரையிட வேண்டும்.

புதிய திரைப்படம் வெளியிடும்போது தியேட்டர்களில் முறையான போக்குவரத்து மற்றும் வாகன நிறுத்தும் வசதிகளை உரிமையாளர்கள் செய்திருக்க வேண்டும்.

தியேட்டர்களில் கூடுதல் காட்சி நடத்தப்படும்போது சுகாதார குறைபாடுகள் மற்றும் கூட்டநெரிசல் ஏற்படாத வகையில் பார்த்து கொள்ள வேண்டும்.

தியேட்டர்களில் ரசிகர்கள் வாகனங்கள் எளிதாக உள்ளே வந்து, வெளியேறும் வகையில் ஏற்பாடு செய்ய வேண்டும். போலீசாரின் பாதுகாப்பு பெறுவதற்கு தக்க ஏற்பாடுகள் செய்து கொள்ள வேண்டும்.

கூடுதல் கட்டணம்

ரசிகர்கள் காட்சி அரங்கிற்குள் சிரமமின்றி உள்ளே வந்து, வெளியே செல்லும் வகையில் ஏற்பாடு செய்ய வேண்டும். இருக்கைகள், தியேட்டர்களின் வளாகத்தை சுத்தமாக வைத்து கொள்ள வேண்டும். தியேட்டர்களை சுகாதாரமாக பராமரிக்க போதுமான காலஇடைவெளியுடன், உரிய பாதுகாப்பு நடைமுறைகளுடன் சிறப்பு காட்சி நடத்தப்பட வேண்டும். அரசால் நிர்ணயிக்கப்பட்ட கட்டணத்தைவிட கூடுதலாக நுழைவு கட்டணத்தையோ, வாகன நிறுத்த கட்டணத்தையோ வசூலிக்கக்கூடாது.

இந்த தகவலை ஈரோடு மாவட்ட கலெக்டர் ராஜகோபால் சுன்கரா தெரிவித்து உள்ளார்.