தோட்டத்தில் புகுந்து விடிய விடிய ஒற்றை யானை அட்டகாசம்

தாளவாடி அருகே தோட்டத்தில் புகுந்து விடிய விடிய ஒற்றை யானை அட்டகாசத்தில் ஈடுபட்டது. இதில் 150 வாழைகள் நாசம் அடைந்தன.

ஒற்றை யானை

சத்தியமங்கலம் புலிகள் காப்பகத்தில் மொத்தம் 10 வனச்சரகங்கள் உள்ளன. இந்த வனச்சரகங்களில் யானை உள்பட ஏராளமான வனவிலங்குகள் வசித்து வருகின்றன. இவை அடிக்கடி உணவு தண்ணீா் தேடி அருகே உள்ள விவசாய தோட்டங்களில் புகுந்து பயிா்களை நாசம் செய்து வருகின்றன. தாளவாடி அருகே ஜீர்கள்ளி வனச்சரகத்துக்கு உள்பட்ட கிருஷ்ணபுரம் கிராமத்தை சோ்ந்தவா் ஜீவாநத்தம் (வயது40). விவசாயி. இவரது வீட்டையொட்டி தோட்டம் உள்ளது. இங்கு அவர் 2 ஏக்கா் பரப்பளவில் வாழை சாகுபடி செய்துள்ளாா்.

இந்த நிலையில் நேற்று முன்தினம் இரவு 11 மணி அளவில் வனப்பகுதியில் இருந்து வெளியேறிய ஒற்றை யானை ஜீவாநத்தத்தின் வாழை தோட்டத்துக்குள் புகுந்தது. பின்னா் அங்கு பயிா் செய்யப்பட்டிருந்த வாழைகளை தின்றும் மிதித்தும் நாசப்படுத்த தொடங்கியது. சத்தம் கேட்டு வீட்டில் தூங்கி கொண்டிருந்த ஜீவாநத்தம் திடுக்கிட்டு எழுந்தாா். பின்னா் தோட்டத்துக்கு சென்று பாா்த்தாா். அங்கு யானை நின்று கொண்டு வாழைகளை நாசப்படுத்தி கொண்டிருப்பதை பாா்த்து அதிா்ச்சி அடைந்தாா்.

வாழைகள் நாசம்

உடனே அக்கம்பக்கத்து விவசாயிகளுக்கு தகவல் கொடுத்தாா். அதைத்தொடா்ந்து விவசாயிகள் அனைவரும் ஒன்று திரண்டனா். பின்னா் சத்தம் போட்டு யானையை அங்கிருந்து விரட்டும் முயற்சியில் ஈடுபட்டனா். ஆனால் யானை அங்கிருந்து செல்லவில்லை. தொடா்ந்து வாழைகளை நாசப்படுத்தியது. நேற்று காலை 6 மணி அளவில் தானாகவே யானை வனப்பகுதிக்குள் சென்றது. இதில் சுமாா் 150 வாழைகள் சேதமாகின.

இதுகுறித்து விவசாயிகள் கூறும்போது, 'யானையால் சேதப்படுத்தப்பட்ட விவசாய பயிருக்கு வனத்துறையினா் இழப்பீடு வழங்க வேண்டும். மேலும் வனப்பகுதியை சுற்றி ஆழமாகவும் அகலமாகவும் அகழி அமைக்க நடவடிக்கை எடுக்க வேண்டும்' என்றனா்.