ஐ.டி. ஊழியர் தூக்குப்போட்டு தற்கொலை

பொள்ளாச்சி

குதிரை வாங்கி கொடுக்க தந்தை மறுத்த விரக்தியில் ஐ.டி. ஊழியர் தூக்குப்போட்டு தற்கொலை செய்து கொண்டார்.

ஐ.டி. ஊழியர்

பொள்ளாச்சி அருகே உள்ள மஞ்சநாயக்கனூரை சேர்ந்தவர் பாலசுப்பிரமணியம் (வயது 54). இவரது மகன் மோகனபிரசாத் (வயது 24). இவர் எம்.எஸ்.சி.(ஐ.டி.) படித்து உள்ளார். மேலும் வீட்டில் இருந்து ஒரு ஐ.டி. நிறுவனத்தில் வேலை பார்த்து வந்தார். இந்த நிலையில் மோகனபிரசாத்துக்கு குதிரை சவாரி செய்வது பிடிக்கும். இதனால் புதிதாக குதிரை வாங்கி சவாரி செய்வதற்கு ஆசைப்பட்டார். உடனே தனது தந்தையிடம் குதிரை வாங்கி தருமாறு கேட்டதாக தெரிகிறது. ஆனால் அவர் வாங்கி தருவதற்கு மறுத்துவிட்டார். இதனால் மோகன பிரசாத்துக்கு விரக்தி ஏற்பட்டது.

தூக்கில் தொங்கினார்

இதையடுத்து அவர் தனது அறைக்குள் சென்று கதவை பூட்டி கொண்டார். ஆனால் வழக்கம்போல் கதவை பூட்டி கொண்டு வேலை செய்வதாக பெற்றோர் நினைத்து கொண்டனர்.

இதற்கிடையில் அந்த அறையில் ஏதோ பொருள் கீழே விழுவது போன்ற சத்தம் கேட்டது. உடனே பெற்றோர் பதறி அடித்து கொண்டு ஓடி வந்து கதவை தட்டி பார்த்தனர். ஆனால் கதவை திறக்காததால் உடைத்துக்கொண்டு உள்ளே சென்று பார்த்தனர். அப்போது, மோகனபிரசாத் தூக்கில் தொங்கி கொண்டிருப்பதை பார்த்து அதிர்ச்சி அடைந்தனர். உடனே அவரை மீட்டு பொள்ளாச்சி அரசு ஆஸ்பத்திரிக்கு சிகிச்சைக்காக அழைத்து வந்தனர்.

பிரேத பரிசோதனை

அங்கு அவரை பரிசோதனை செய்த டாக்டர், மோகனபிரசாத் ஏற்கனவே இறந்து விட்டதாக கூறினார். இதைத்தொடர்ந்து பிரேத பரிசோதனைக்கு அவரது உடல் அனுப்பி வைக்கப்பட்டது. இதுகுறித்து ஆழியாறு போலீஸ் நிலையத்தில் புகார் கொடுக்கப்பட்டது. இந்த புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.

தந்தை குதிரை வாங்கி கொடுக்காத விரக்தியில் ஐ.டி. ஊழியர் தற்கொலை செய்து கொண்டது பரிதாபத்தை ஏற்படுத்தி உள்ளது.