செல்போன்களை திரும்ப தரக்கோரி சிறைவாசிகள் காத்திருப்பு போராட்டம்

திருச்சி மத்திய சிறை வளாகத்தில் சிறப்பு முகாம் உள்ளது. பல்வேறு வழக்குகளில் தொடர்புடைய வெளிநாட்டினர் இங்கு தங்க வைக்கப்பட்டுள்ளனர். கடந்த மாதம் இந்த சிறப்பு முகாமில் நடத்தப்பட்ட சோதனையில் 155 செல்போன்கள், 3 லேப்டாப், ஸ்மார்ட் வாட்ச் ஆகியவை பறிமுதல் செய்யப்பட்டன. இந்த செல்போன்களை திரும்ப வழங்க வேண்டும் என்று முகாம் சிறைவாசிகள் தொடர்ந்து பல்வேறு கட்ட போராட்டங்களில் ஈடுபட்டு வருகின்றனர். இதன் ஒரு பகுதியாக கடந்த 7-ந்தேதி முகாம்வாசிகள் 13 பேர் அளவுக்கு அதிகமான மாத்திரைகளை சாப்பிட்டு திடீரென மயங்கினர். இந்த சம்பவத்தால் பரபரப்பு ஏற்பட்டது. 10-ந்தேதி இரவு சிறப்பு முகாம்வாசிகள் 23 பேர் முகாம் சுவரின் மீது ஏறி திடீரென போராட்டத்தில் ஈடுபட்டனர். இதையடுத்து நேற்று 25-வது நாளாக பறிமுதல் செய்யப்பட்ட செல்போன்களை எங்களிடம் ஒப்படைக்க வேண்டும் என்று 60-க்கும் மேற்பட்டோர் காத்திருப்பு போராட்டத்தில் ஈடுபட்டனர். சிலர் உண்ணாவிரத போராட்டத்திலும் ஈடுபட்டனர். இதனால் அங்கு போலீசார் பலத்த பாதுகாப்பு பணியில் ஈடுபட்டு வருகின்றனர்.