மோட்டார் சைக்கிள் மீது ஜீப் மோதி வாலிபர் பலி

சென்னையை சேர்ந்தவர் கிருஷ்ணகுமார் (வயது 21). இவர் நேற்று முன்தினம் மோட்டார் சைக்கிளில் காஞ்சீபுரத்தில் உள்ள தனது நண்பர் விக்கி (20) என்பவரை பார்த்துள்ளார். பின்னர், அன்று இரவு அரக்கோணத்தில் உள்ள விக்கியின் சித்தி வீட்டிற்கு இருவரும் மோட்டார் சைக்கிளில் வந்துள்ளனர். இரவு 11.30 மணி அளவில் அரக்கோணம் - காஞ்சீபுரம் சாலையில் பெருமூச்சி அருகே வந்தபோது முன்னால் சென்று கொண்டிருந்த லாரியை முந்த முயன்றுள்ளனர்.

அப்போது எதிரே வந்த ஜீப் மோட்டார் சைக்கிள் மீது மோதியது. இதில் இருவரும் தூக்கி வீசப்பட்டு கிருஷ்ணகுமார் சம்பவ இடத்திலேயே பலியானார். இதுபற்றி தகவல் அறிந்ததும் அரக்கோணம் டவுன் போலீசார் சென்று உடலை மீட்டு பிரேத பரிசோதனைக்காக அரக்கோணம் அரசு மருத்துவமனைக்கு அனுப்பி வைத்தனர். மேலும் இது குறித்து போலீசார் வழக்குப் பதிவு செய்து விசாரணை நடத்தி வருகின்றனர்.