கோட்டை மாரியம்மன் கோவில் ஆடித்திருவிழா: மாவட்டத்தில் 9-ந் தேதி உள்ளூர் விடுமுறை-கலெக்டர் கார்மேகம் அறிவிப்பு

சேலம் மாவட்ட கலெக்டர் கார்மேகம் வெளியிட்டுள்ள செய்திக்குறிப்பில் கூறி இருப்பதாவது:-

சேலம் கோட்டை மாரியம்மன் கோவில் ஆடித்திருவிழாவை முன்னிட்டு மாவட்டத்தில் உள்ள அனைத்து அரசு அலுவலகங்கள் மற்றும் கல்வி நிறுவனங்களுக்கு வருகிற 9-ந் தேதி உள்ளூர் விடுமுறையாக அறிவிக்கப்படுகிறது. இந்த உள்ளூர் விடுமுறை, செலாவணி முறிச்சட்டம் 1881-ன் கீழ் வராது என்பதால் அன்றைய தினம் அரசு பாதுகாப்புக்கான அவசர அலுவல்கள் கவனிக்கும் வகையில் மாவட்டத்தில் உள்ள மாவட்ட கருவூலம் மற்றும் சார்நிலை கருவூலங்கள் குறிப்பிட்ட பணியாளர்களோடு செயல்படும்.

இந்த உள்ளூர் விடுமுறைக்கு ஈடாக மாவட்டத்தில் உள்ள அனைத்து அரசு அலுவலகங்கள் மற்றும் கல்வி நிறுவனங்களும் செப்டம்பர் மாதம் 2-ந் தேதி ஈடுகட்டும் பணி நாளாக அறிவிக்கப்படுகிறது. அன்றைய தினம் அலுவலகங்கள் இயங்கும். இவ்வாறு அதில் கூறப்பட்டுள்ளது.