பிரசன்ன வெங்கடாஜலபதி கோவிலில் ஆண்டாளுக்கு கூடாரவல்லி வைபவம்

பெரம்பலூர் மாவட்டம், வேப்பந்தட்டை தாலுகா, வாலிகண்டபுரத்தில் பத்மாவதி தாயார் சமேத ஆண்டாள் நாச்சியார் பிரசன்ன வெங்கடாஜலபதி கோவில் உள்ளது. இந்த கோவிலில் ஆண்டாளுக்கு கூடாரவல்லி என்று சொல்லக்கூடிய வைபவம் நேற்று மாலை நடந்தது.

இதையொட்டி ஆண்டாள் நாச்சியாருக்கு சிறப்பு அபிஷேகம் நடத்தப்பட்டு, சிறப்பு அலங்காரம் செய்யப்பட்டு, தீபாராதனை காட்டப்பட்டது. மேலும் மூலவர் பிரசன்ன வெங்கடாஜலபதிக்கும், பத்மாவதி தயாருக்கும் அபிஷேகம் செய்யப்பட்டு, சிறப்பு அலங்காரம் செய்யப்பட்டு தீபாராதனை காட்டப்பட்டது. இதில் கலந்து கொண்ட பக்தர்கள் சாமியை பயபக்தியுடன் தரிசனம் செய்தனர். அவர்களுக்கு பிரசாதம் வழங்கப்பட்டது.

இதேபோல் பெரம்பலூர் மதனகோபாலசுவாமி கோவிலில் உள்ள ஆண்டாள் சன்னதியில் கூடார வல்லி உற்சவம் நடந்தது. இதையொட்டி ஆண்டாள் பக்தர்கள் பேரவை சார்பில் ஆண்டாள் நாச்சியார் மூலவருக்கு திருமஞ்சனமும், வண்ணமலர்மாலை அலங்காரம் மற்றும் மகாதீபாராதனை நடந்தது. இதில் திரளான பக்தர்கள் கலந்துகொண்டு திருப்பாவையின் 27-வது பாசுரமான கூடாரை வெல்லும் சீர் கோவிந்தா என்ற பாசுரத்தை பாடி வழிபாடு நடத்தினர்.