லாரி டிரைவர் கல்லால் தாக்கி கொலை

பரமத்திவேலூர்

லாரி டிரைவர்

நாமக்கல் மாவட்டம் பரமத்திவேலூர் தாலுகா ஓவியம்பாளையத்தை சேர்ந்தவர் ஹரிச்சந்திரன் (வயது 50). லாரி டிரைவர். இவருடைய நண்பர் சேகர். இந்தநிலையில் நேற்று இரவு ஹரிச்சந்திரன் தனது நண்பர் சேகரை பார்க்க கபிலர்மலைக்கு மோட்டார் சைக்கிளில் சென்றார். மலையின் பின்புறம் அவர் சேகருக்காக காத்திருந்தார்.

அப்போது அங்கு மதுபோதையில் 2 பேர் வந்தனர். அவர்கள் ஹரிச்சந்திரனிடம், எதற்காக இங்கே நிற்கிறாய்? எனக்கேட்டு தகராறில் ஈடுபட்டனர். இதனால் அவர்களுக்கிடையே வாக்குவாதம் ஏற்பட்டது. இதில் ஆத்திரமடைந்த அவர்கள் ஹரிச்சந்திரனை அடித்து, உதைத்தனர்.

கல்லால் தாக்கி கொலை

மேலும் அங்கே கிடந்த கல்லை எடுத்து அவரை சரமாரியாக தாக்கினர். இதில் ஹரிச்சந்திரனுக்கு பலத்த காயம் ஏற்பட்டது. அவர் ரத்த வெள்ளத்தில் சம்பவ இடத்திலேயே பலியானார். அவரை கொலை செய்தவர்கள் அங்கிருந்து தப்பி ஓடி விட்டனர். சம்பவம் நடந்த இடத்துக்கு வந்த சேகர், ஹரிச்சந்திரன் கொலை செய்யப்பட்டு கிடந்ததை பார்த்து அதிர்ச்சி அடைந்தார். மேலும் ஜேடர்பாளையம் போலீசுக்கு தகவல் தெரிவித்தார்.

அதன்பேரில் போலீசார் அங்கு விரைந்து சென்று, விசாரணை நடத்தினர். அப்போது ஹரிச்சந்திரனை கல்லால் தாக்கி கொலை செய்தது, நன்செய் இடையாறு பகுதியை சேர்ந்த மோகனசுந்தரம், வெங்கரையை சேர்ந்த கார்த்திக் என்பது தெரியவந்தது.

வலைவீச்சு

இதையடுத்து போலீசார் ஹரிச்சந்திரன் உடலை கைப்பற்றி பிரேத பரிசோதனைக்காக பரமத்திவேலூர் அரசு ஆஸ்பத்திரிக்கு அனுப்பி வைத்தனர். மேலும் கொலை குறித்து வழக்குப்பதிவு செய்து, மோகனசுந்தரம், கார்த்திக் ஆகியோரை வலைவீசி தேடி வருகிறார்கள்.

கபிலர்மலையில் நண்பருக்காக காத்திருந்த லாரி டிரைவர் கல்லால் தாக்கி கொலை செய்யப்பட்ட சம்பவம் அந்த பகுதியில் பரபரப்பை ஏற்படுத்தி உள்ளது.