பறவைகளை வேட்டையாட முயன்றவர் கைது

வேதாரண்யம்:

வேதாரண்யம் தாலுகா கோடிக்கரை பறவைகள் சரணாலயம் அமைந்துள்ளது. இந்தபறவைகள் சரணாலயத்திற்கு வரும் பறவைகளை சிலர் வலைவைத்து பிடிப்பதாக வனத்துறையினருக்கு தகவல் கிடைத்தது. இதை தொடர்ந்து திருச்சி மண்டல தலைமை வனப்பாதுகாவலர் சதீஷ், நாகை வனஉயிரினக் காப்பாளர் யோகேஷ்குமார் மீனா ஆகியோரின் உத்தரவின்படி வேதாரண்யம் வனச்சரக அலுவலர் அயூப்கான் தலைமையில் வனவர்கள் ராமதாஸ், செல்வி, மகாலெட்சுமி, வனக்காப்பாளர் ரணீஷ்குமார், வேட்டை தடுப்பு காவலர் பாண்டியன் ஆகியோர் கண்காணிப்பு பணியில் ஈடுபட்டனர். அப்போது செட்டிபுலம் மேலக்காட்டை சேர்ந்த செந்தில்குமார் (வயது40) என்பவர் தனது வீட்டிற்கு அருகில் உள்ள அவரது தோட்டத்தில் உள்ள மரங்களில் குயில் பறவைகளை பிடிக்க கண்ணி வைத்திருந்தது தெரிய வந்தது. இதையடுத்து அவரிடம் இருந்த கண்ணி வலைகளை பறிமுதல் செய்தனர். மேலும் வனஉயிரினக்காப்பாளர் யோகேஷ்குமார் உத்தரவின்படி செந்தில்குமாரை கைது செய்து அவருக்கு ரூ.25 ஆயிரம் அபராதம் விதித்தனர்.