தகவல் அறியும் உரிமை சட்ட விழிப்புணர்வு மாரத்தான்

தகவல் அறியும் உரிமை சட்ட விழிப்புணர்வு மாரத்தான் தாராபுரம் மற்றும் காங்கயத்தில் போலீஸ் நிலையம் சார்பில் நடைபெற்றது.

மாரத்தான்

தகவல் அறியும் உரிமை சட்ட விழிப்புணர்வு மாரத்தான் தாராபுரத்தில் தமிழ்நாடு காவல்துறை தாராபுரம் உட்கோட்டம் சார்பில் மினி மராத்தான் வேக நடை போட்டி நடைபெற்றது. போலீஸ் இன்ஸ்பெக்டர் மணிகண்டன் போட்டியில் கலந்து கொண்ட அனைவரையும் வரவேற்றார். மினி மராத்தான் போட்டியை போலீஸ் துணை சூப்பிரண்டு கலையரசன் தொடங்கி வைத்தார்.அதில் வேக நடை போட்டி 16 வயதுக்கு உட்பட்டவர்கள், 16 வயதுக்கு மேற்பட்டவர்கள் என இரண்டு பிரிவுகளாக நடைபெற்றது. வேக நடை போட்டி தாராபுரம் காவல் நிலையம் முன்பு தொடங்கி பூக்கடை கார்னர், ஐந்து சாலை சந்திப்பு, அரசு மருத்துவ மனை, தாசில்தார் அலுவலகம் வழியாக காவல் நிலையம் வந்து அடைந்தனர்.

இந்த போட்டியில் 16 வயதுக்கு உட்பட்டவர்கள் பிரிவிலும் முதல் மூன்று இடங்களை பிடிப்பவர்களுக்கு முதல் பரிசு ரூ.1000, இரண்டாம் பரிசு ரூ.750 மூன்றாம் பரிசு ரூ.500 அறிவிக்கப்பட்டது. அதே போன்று 16 வயதுக்கு மேற்பட்டவர்கள் பிரிவில் முதல் பரிசு ரூ.2000, இரண்டாம் பரிசு ரூ.1000-ம், மூன்றாவது பரிசு ரூ. 500 அறிவிக்கப்பட்டது.அத்துடன் மேலும் இரண்டு பிரிவுகளிலும் முதல் பத்து இடங்களை பிடிப்பவர்களுக்கு மெடல் வழங்கப்படும் என அறிவித்து இருந்தனர். இந்த போட்டியை தாராபுரம் போலீஸ் துணை சூப்பிரண்டு கலையரசன் கொடி அசைத்து தொடங்கி வைத்தார்.

16 வயதுக்கு உட்பட்டவர்கள் பிரிவில் ஹரிஹரன், ஹரி சரண், தீபக் ஆகியோர் முதல் மூன்று இடங்களை பிடித்தனர். அடுத்து 16 வயதிற்கு மேற்பட்டவர்கள் பிரிவில். முகமது வாசர் மற்றும் அம்ருத், முகமது தபிக் மற்றும் நவீன் ராஜ், போல்ராம் ஆகியோர் முதல் மூன்று இடங்களை பிடித்தனர். மேலும் இரண்டு பிரிவுகளிலும் முதல் பத்து இடங்களை பிடித்தவர்களுக்கு பதக்கங்களும் பரிசுகளும் வழங்கப்பட்டது. இந்த போட்டியில், ஆண்கள், பெண்கள், சிறுவர்கள் என 300-க்கும் மேற்பட்டவர்கள் உற்சாகமாக கலந்து கொண்டனர்.

காங்கயம்

காங்கயம் போலீஸ் நிலையம் சார்பில் நடைபெற்ற மாரத்தான் போட்டியை துணை போலீஸ் சூப்பிரண்டு பார்த்தீபன் தொடங்கி வைத்தார். காங்கயம் போலீஸ் நிலைய ரவுண்டானா பகுதியில் தொடங்கிய மாரத்தான் போட்டி மெயின் ரோடு, திருப்பூர் ரோடு வழியாக நீலக்காட்டுப்புதூர் வரை சென்று மீண்டும் காங்கயம் பஸ் நிலையத்தில் வந்து முடிவடைந்தது.

5 கிலோ மீட்டர் தூரம் நடைபெற்ற மாரத்தான் போட்டியில் தனியார் கல்லூரி மாணவ-மாணவிகள் நூற்றுக்கும் மேற்பட்டோர் கலந்து கொண்டனர். இதில் காங்கயம் போலீஸ் இன்ஸ்பெக்டர் காமராஜ், சப்-இன்ஸ்பெக்டர்கள் சந்திரன், கார்த்திக், சத்தியமூர்த்தி ஆகியோர் கலந்து கொண்டனர். இதில் வெற்றி பெற்ற மாணவ- மாணவிகளுக்கு பரிசுகளும் கலந்து கொண்ட அனைவருக்கும் சான்றிதழ்களும் வழங்கப்பட்டது.