'ஹெல்த் மிக்ஸ்' குறித்து தவறான கருத்து: அண்ணாமலை மீது வழக்கு தொடரப்படும் அமைச்சர் பேட்டி

கோவை,

தமிழக பால்வளத்துறை அமைச்சர் நாசர் நேற்று கோவை ஆர்.எஸ்.புரம் ஆவின் பால் நிலையத்தில் புதிதாக அமைக்கப்பட்ட உயர்தொழில்நுட்ப ஆவின் பாலகத்தை ரிப்பன் வெட்டியும், குத்துவிளக்கேற்றியும் திறந்து வைத்தார். பின்னர் அவர் நிருபர்களுக்கு அளித்த பேட்டியில் கூறியதாவது:-

உற்பத்தியை அதிகரிக்க நடவடிக்கை

ஆவின் பால் உற்பத்தியை அதிகரிக்க முதல்-அமைச்சர் மு.க.ஸ்டாலின் உத்தரவின் பேரில் நடவடிக்கை எடுக்கப்பட்டு வருகிறது. அதன்படி உற்பத்தியை அதிகரிக்க தமிழகம் முழுவதும் ஆவின் விற்பனை நிலையங்களை தொடங்கி வருகிறோம்.

கோவை மாநகரத்தில் ரூ.1 கோடியில் ஆவின் பாலகத்தை திறந்து வைத்துள்ளோம். முதல்-அமைச்சர் மு.க.ஸ்டாலின், பால் விலையை குறைத்ததால் ஆவின் பால் விற்பனை அதிகரித்துள்ளது.

கடந்த ஆட்சியின் போது காலிப்பணியிடங்களை நிரப்ப முறைகேடு நடந்துள்ளது. இந்த நிலையில் தி.மு.க. ஆட்சிக்கு வந்தவுடன் அந்த பணியிடங்கள் நிறுத்தப்பட்டு விட்டது. அதனை முறைப்படுத்தி காலிப்பணியிடங்கள் விரைவில் நிரப்பப்படும். ஆவின் தலைவர் பதவி இடத்தை நிரப்ப நடவடிக்கை எடுக்கப்பட்டு வருகிறது.

அண்ணாமலை மீது வழக்கு

பா.ஜ.க. மாநில தலைவர் அண்ணாமலை எங்களின் தரத்திற்கு ஏற்றவாறு பேசினால் கருத்து தெரிவிக்கலாம். ஹெல்த் மிக்ஸ் தொடர்பாக அண்ணாமலை தெரிவித்த கருத்து தவறானது.

ஹெல்த் மிக்ஸ் பொருட்கள் தயாரிக்க சாத்தியம் குறித்த பணிகள் நடைபெற்று வருகிறது. இந்த ஆய்வின் முடிவுக்கு பிறகு தான் ஹெல்த் மிக்ஸ் பொருட்கள் விற்பனைக்கு கொண்டு வரப்படும். அதற்குள், மருத்துவம் மற்றும் மக்கள் நல்வாழ்வுத்துறை அமைச்சர் ரூ.77 கோடி வாங்கியதாக குற்றம் சாட்டியுள்ளார். இது தொடர்பாக அண்ணாமலை மீது வழக்கு தொடரப்படும்.

இவ்வாறு அவர் கூறினார்.