லாரி மீது மோட்டார் சைக்கிள் மோதல்; கல்லூரி மாணவர் பலி

கல்லூரி மாணவர்

பெரம்பலூர் மாவட்டம் குன்னம் தாலுகா மங்களமேடு பகுதியை சேர்ந்தவர் குணசேகரன். இவரது மகன் சாரதி (வயது 22). இவர் பெரம்பலூரில் உள்ள தனியார் கல்லூரியில் பி.சி.ஏ. 3-ம் ஆண்டு படித்து வந்தார். இவர் நேற்று முன்தினம் இரவு திருமாந்துறை சுங்கச்சாவடியில் நின்று கொண்டிருந்த தனது நண்பரை அழைத்து வருவதற்காக மோட்டார் சைக்கிளில் சென்று கொண்டு இருந்தார்.

மங்களமேடு அருகே சென்னை தேசிய நெடுஞ்சாலையில் உள்ள வல்லாபுரம் தனியார் பெட்ரோல் விற்பனை நிலையம் அருகே சென்ற போது திண்டுக்கல்லில் இருந்து சென்னை நோக்கி சென்ற லாரியின் பின்பகுதியில் சாரதியின் மோட்டார் சைக்கிள் எதிர்பாராதவிதமாக மோதியது.

சிகிச்சை பலனின்றி சாவு

இந்த விபத்தில் சாலையில் தூக்கி வீசப்பட்ட சாரதி தலையில் பலத்த காயம் அடைந்து உயிருக்கு போராடிக்கொண்டு இருந்தார். இதையடுத்து அந்த வழியாக சென்ற வாகன ஓட்டிகள் அவரை மீட்டு 108 ஆம்புலன்ஸ் மூலம் பெரம்பலூர் அரசு மருத்துவமனைக்கு கொண்டு சென்றனர். அங்கு அவருக்கு டாக்டர்கள் தீவிர சிகிச்சை அளித்தனர். பின்னர் மேல் சிகிச்சைக்காக திருச்சி அரசு மருத்துவமனைக்கு கொண்டு சென்றனர். ஆனால் செல்லும் வழியிலேயே சாரதி பரிதாபமாக இறந்தார்.இந்த விபத்து குறித்து மங்களமேடு போலீசார் வழக்குப்பதிவு செய்து விசாரணை நடத்தி வருகின்றனர்.