போதைப்பொருள் தடுப்பு குறித்த மோட்டார் சைக்கிள் பேரணி

கள்ளக்குறிச்சி

கள்ளக்குறிச்சியில் போதைப்பொருள் தடுப்பு குறித்த மோட்டார் சைக்கிள் விழிப்புணர்வு பேரணி நடைபெற்றது. இதற்கு மாவட்ட போலீஸ்சூப்பிரண்டு பகலவன் முன்னிலை வகித்தார். கலெக்டர் ஷ்ரவன் குமார் கொடியசைத்து பேரணியை தொடங்கி வைத்தார். இதில் காவல்துறை, வருவாய்த்துறை, ஊரக வளர்ச்சித்துறை, வனத்துறை, தீயணைப்புத்துறை ஆகிய துறைகளை சேர்ந்த அரசு அலுவலர்கள் மோட்டார் சைக்கிளில் போதை பொருளுக்கு எதிரான வாசகங்கள் அடங்கிய விழிப்புணர்வு பதாகைகளுடன் சென்று பொதுமக்களுக்கு விழிப்புணர்வு ஏற்படுத்தினர். மாவட்ட கலெக்டர் அலுவலக வளாகத்தில் இருந்து புறப்பட்ட இந்த பேரணி நகரின் முக்கிய சாலைகள் வழியாக ஏ.கே.டி. பள்ளியில் சென்று முடிவடைந்தது. இதில் கூடுதல் போலீஸ் சூப்பிரண்டுகள் ஜவஹர்லால், விஜய கார்த்திக்ராஜ், கலெக்டரின் நேர்முக உதவியாளர்(பொது) சுரேஷ், கள்ளக்குறிச்சி துணை போலீஸ் சூப்பிரண்டு புகழேந்தி கணேசன் மற்றும் அரசு அலுவலர்கள் கலந்து கொண்டனர்.