மோட்டார் சைக்கிள் திருடன் கைது

சாத்தூர்

சாத்தூர் தாலுகா ஓ.மேட்டுப்பட்டியை சேர்ந்தவர் கார்த்திக்(வயது 32). இவரது நண்பர்கள் கார்த்திக், பிச்சை ஆகியோருடன் சடையம்பட்டி விலக்கில் உள்ள கடைக்கு டீ குடிக்க சென்றனர். அங்கு கார்த்திக் ஓட்டி வந்த இருசக்கர வாகனத்தை மர்ம நபர் திருடிக்கொண்டு அந்த வாகனத்தை ஓட்டிச் சென்றார். இதனை பார்த்த மூவரும் உடனே மற்றொரு இருசக்கர வாகனத்தில் விரட்டிச் சென்று உப்பத்தூர் விலக்கு அருகே இருசக்கர வாகனத்தை திருடி சென்றவரை மடக்கி பிடித்தனர். அப்போது அவர் கோவில்பட்டி கச்சலாபுரத்தைச் சேர்ந்த கண்ணன்(39) என தெரியவந்தது. இவரை சாத்தூர் தாலுகா போலீசில் ஒப்படைத்தனர். இதுகுறித்த புகாரின் பேரில் கண்ணனை கைது செய்து வழக்கு பதிவு செய்து விசாரணை நடத்தி வருகின்றனர்.