தம்மம்பட்டி அருகேசெயற்கை மரக்காலால் அடித்து தாய் கொலைமாற்றுத்திறனாளி மகன் கைது

தம்மம்பட்டி

தம்மம்பட்டி அருகே மரக்கட்டையால் ஆன செயற்கை காலால் அடித்து தாயை கொன்ற மாற்றுத்திறனாளி மகனை போலீசார் கைது செய்தனர்.

மாற்றுத்திறனாளி

சேலம் மாவட்டம், தம்மம்பட்டி அருகே செந்தாரப்பட்டி அருந்ததியர் தெருவை சேர்ந்தவர் தியாகராஜன். இவருடைய மனைவி ராணி (வயது 63). ஓய்வுபெற்ற சத்துணவு அமைப்பாளர். இவருடைய மகன் இளங்கோவன் (47). டிரைவரான இவர் விபத்தில் காலை இழந்ததால், மரக்கட்டையால் ஆன செயற்கை கால் பொருத்தி உள்ளார்.

மது போதைக்கு அடிமையான மாற்றுத்திறனாளியான இவர் தனது தாயார் ராணியிடம் அவரது பெயரில் உள்ள காலி மனைகளை, அதே பகுதியைச் சேர்ந்த ஒருவரிடம் விற்றுவிடலாம் என கேட்டுள்ளார். அதற்கு தாயார் ராணி மறுத்துள்ளார்.

அடித்துக்கொலை

இதனால் ஆத்திரம் அடைந்த இளங்கோவன், ஆத்திரத்தில் தான் பொருத்தியிருந்த மரக்கட்டையால் ஆன செயற்கை காலை கழற்றி தாய் என்றும் பாராமல் சரமாரியாக ராணியை அடித்து தாக்கினார். இதில் தலையில் படுகாயம் அடைந்த ராணி உயிருக்கு ஆபத்தான நிலையில் சேலம் அரசு ஆஸ்பத்திரியில் சேர்க்கப்பட்டு சிகிச்சை பெற்றார். இந்த நிலையில் அவர் சிகிச்சை பலனின்றி இறந்துவிட்டார்.

இதையடுத்து ஓய்வுபெற்ற சத்துணவு அமைப்பாளர் கொலை சம்பவம் குறித்து வழக்குப்பதிவு செய்த தம்மம்பட்டி போலீசார், அவருடைய மகனான மாற்றுத்திறனாளி இளங்கோவன் மீது கொலை வழக்குப்பதிவு செய்து அவரை கைது செய்தனர். இந்த சம்பவம் தம்மம்பட்டி அருகே பரபரப்பை ஏற்படுத்தி உள்ளது.