மாயமான இளம்பெண் சாக்கடையில் பிணமாக மீட்பு

வடவள்ளி

வடவள்ளி அருகே மாயமான இளம்பெண் சாக்கடையில் பிணமாக மீட்கப்பட்டார். இதுகுறித்து போலீசார் விசாரணை நடத்தி வருகின்றனர்.

இளம்பெண் மாயம்

கோவை வடவள்ளி அருகே உள்ள வீரகேரளம் பகுதியை சேர்ந்தவர் ராஜநாயுடு. இவருடைய 2-வது மகள் நிஷாந்தி (வயது 26). இவர் கடந்த 2 நாட்களுக்கு முன்பு வெளியில் செல்வதாக பெற்றோரிடம் கூறிவிட்டு சென்றார். பின்னர் நீண்ட நேரமாகியும் அவர் வீடு திரும்பவில்லை. இதனால் அதிர்ச்சியடைந்த பெற்றோர் அவரை பல்வேறு இடங்களில் தேடினர். ஆனால் கண்டுபிடிக்க முடியவில்லை.

இதுகுறித்து அவர்கள் வடவள்ளி போலீசில் புகார் அளித்தனர். இதன்பேரில் போலீசார் வழக்குப்பதிவு, இளம்பெண்ணை தேடி வந்தனர்.

சாக்கடையில் பிணமாக மீட்பு

இந்த நிலையில் நேற்று காலை வீரகேரளம் பகுதியில் உள்ள தனியார் மருத்துவமனை அருகே தூய்மை பணியாளர்கள் பணியில் ஈடுபட்டிருந்தனர். அப்போது, அங்கு சாலையோர சாக்கடை கால்வாயில் இளம்பெண் ஒருவர் பிணமாக கிடந்தார். இதனைக்கண்டு அதிர்ச்சியடைந்த அவர்கள், இதுகுறித்து வடவள்ளி போலீசாருக்கு தகவல் கொடுத்தனர்.சம்பவ இடத்திற்கு விரைந்து வந்த போலீசார் இளம்பெண்ணின் உடலை மீட்டு விசாரணை நடத்தினர். இதில் பிணமாக கிடந்தது, நிஷாந்தி என்பது தெரியவந்தது. இதையடுத்து அவரது உடலை பிரேத பரிசோதனைக்காக கோவை அரசு ஆஸ்பத்திரிக்கு அனுப்பி வைத்தனர்.

போலீசார் விசாரணை

இதையடுத்து போலீசார் இளம்பெண் மாயமான வழக்கை, மர்மச்சாவு வழக்காக மாற்றினர். மேலும் இளம்பெண் தற்கொலை செய்து கொண்டாரா? அல்லது கொலை செய்யப்பட்டு சாக்கடையில் வீசப்பட்டாரா? அல்லது வேறு எதுவும் காரணமாக என்பது குறித்து பல்வேறு கோணங்களில் போலீசார் விசாரணை நடத்தி வருகின்றனர்.கோவை அருகே வீட்டில் இருந்து மாயமான இளம்பெண் சாக்கடை கால்வாயில் பிணமாக மீட்கப்பட்ட சம்பவம் அந்த பகுதியில் பரபரப்பை ஏற்படுத்தியுள்ளது.