கன்னியாகுமரியில் புதிதாக அமைக்கப்பட்டுள்ளது: 150 அடி உயர கம்பத்தில் பட்டொளி வீசி பறக்கும் தேசியக்கொடி

கன்னியாகுமரி,

இந்தியாவின் தென்கோடி முனையில் உள்ள கன்னியாகுமரி புகழ்பெற்ற சுற்றுலா தலமாகும். இங்கு தினமும் ஆயிரக்கணக்கான உள்நாட்டு மற்றும் வெளிநாட்டு சுற்றுலா பயணிகள் வந்து செல்கிறார்கள்.

இங்கு வரும் சுற்றுலா பயணிகளை கவரும் வகையில், நாட்டின் எல்லை பகுதி, டெல்லியில் இருப்பது போல் மிக உயரமான தேசிய கொடிக்கம்பம் அமைக்க மத்திய அரசு அனுமதி அளித்தது. இதற்காக விஜயகுமார் எம்.பி., தனது தொகுதி நிதியில் இருந்து ரூ.75 லட்சத்தை ஒதுக்கினார்.

அதன்படி கன்னியாகுமரி மகாதானபுரம் ரவுண்டானா சந்திப்பு நான்குவழி சாலையில் 150 அடி உயர கொடிக்கம்பம் நிறுவப்பட்டது. இதன் திறப்பு விழா நேற்று நடைபெற்றது.

தேசியக்கொடி ஏற்றப்பட்டது

இந்த விழாவுக்கு குமரி மாவட்ட கலெக்டர் அரவிந்த் தலைமை தாங்கினார். மாவட்ட போலீஸ் சூப்பிரண்டு ஹரிகிரண் பிரசாத், விஜயகுமார் எம்.பி ஆகியோர் முன்னிலை வகித்தனர்.

விழாவில் 150 அடி உயர கொடிக்கம்பத்தில் அமைச்சர் மனோ தங்கராஜ் தேசியக்கொடியை ஏற்றிவைத்தார். பிரமாண்டமான கொடிக்கம்பத்தில் 48 அடி நீளம், 32 அடி அகலம் உடைய தேசியக்கொடி பறந்தது. இந்த தேசியக்கொடி வருடத்தின் எல்லா நாட்களும் இரவும், பகலுமாக பறக்கவிட ஏற்பாடு செய்யப்பட்டுள்ளது. அதே சமயத்தில் இரவிலும் சுற்றுலா பயணிகள் கண்டுகளிப்பதற்கு வசதியாக கொடிக்கம்பத்தில் மின்விளக்கு வசதிகளும் செய்யப்பட்டுள்ளன.

விஜய் வசந்த் எம்.பி.

இந்த நிகழ்ச்சியில் விஜய் வசந்த் எம்.பி., எம்.எல்.ஏ.க்கள் ராஜேஷ்குமார், பிரின்ஸ், நயினார் நாகேந்திரன், நாகர்கோவில் மேயர் மகேஷ் உள்பட பலர் கலந்து கொண்டனர்.