நூல் விலையில் மாற்றமில்லை

திருப்பூர்

பின்னலாடை உற்பத்தியின் முக்கிய மூலப்பொருளான நூல் விலை இந்த மாதம் மாற்றமில்லை என்று நூற்பாலைகள் அறிவித்துள்ளன.

பருத்தி நூல்

திருப்பூர் பின்னலாடை தொழிலுக்கு முக்கிய மூலப்பொருளாக நூல் உள்ளது. நூல் விலையை வைத்தே பனியன் ஆடைகளின் உற்பத்தி விலையை பின்னலாடை உற்பத்தியாளர்கள் நிர்ணயிப்பது வழக்கம். 15 ஆயிரத்துக்கும் மேற்பட்ட பின்னலாடை நிறுவனங்கள் உள்ளன. 8 லட்சத்துக்கும் மேற்பட்டவர்களுக்கு வேலைவாய்ப்பை வழங்கும் தொழிலாக விளங்கி வருகிறது.

நூல் விலை அபரிதமான உயர்வு காரணமாக பனியன் தொழில் மந்தநிலையை அடைந்தது. அதுபோல் உலக பொருளாதார மந்தம், ரஷியா-உக்ரைன் போர் காரணமாகவும் வெளிநாட்டு ஆர்டர்கள் வருகை வெகுவாக குறைந்து விட்டது. நூல் விலை குறைவாக இருந்தபோதிலும் ஆர்டர் கிடைக்காமல் பனியன் உற்பத்தி குறைந்து வந்தது.

1 மாதத்தில் கிலோவுக்கு ரூ.12 உயர்ந்தது

தீபாவளி பண்டிகை நெருங்கும் இந்த நேரத்தில் புதிய ஆர்டர்களை எடுத்துச்செய்ய உள்நாட்டு பனியன் உற்பத்தியாளர்கள் தயாராகி வந்தனர். இந்தநிலையில் கடந்த மாதம் நூல் விலையை நூற்பாலைகள் கடந்த 1-ந் தேதி அறிவித்தன. அதன்படி 10-ம் நம்பர் நூல் முதல் 30-ம் நம்பர் நூல் வரை கிலோவுக்கு ரூ.7-ம், 34-ம் நம்பர் முதல் அதற்கு மேல் உள்ள நூல் கிலோவுக்கு ரூ.5-ம் உயர்ந்தது.

நூல் விலையை 15 நாட்களுக்கு ஒருமுறை மாற்றியமைப்பது தங்களை பெரும் சிரமத்தில் ஆழ்த்தும் என்று பனியன் உற்பத்தியாளர்கள் கோரிக்கை வைத்து வந்தனர். இந்த நிலையில் கடந்த மாதம் 16-ந் தேதி அனைத்து ரக நூல் விலையும் கிலோவுக்கு மேலும் ரூ.5 உயர்வு செய்து நூற்பாலைகள் அறிவித்தன. நூல் விலை 15 நாட்களுக்கு ஒருமுறை மாற்றியமைப்பதால் ஆடை உற்பத்தி செய்து விற்பனை செய்வதில் சிரமம் ஏற்பட்டுள்ளதாக பனியன் உற்பத்தியாளர்கள் தொடர்ந்து கோரிக்கை வைத்து வருகிறார்கள்.

விலையில் மாற்றமில்லை

இந்த மாதத்துக்கான நூல் விலை நேற்று அறிவிக்கப்பட்டது. நூல் விலையில் மாற்றமில்லை என்றும் கடந்த மாதம் 16-ந் தேதி நூல் விலையே தொடர்வதாக நூற்பாலைகள் அறிவித்துள்ளனர். அதன்படி வரி நீங்கலாக கோம்டு ரக நூல் விலை 16-ம் நம்பர் ரூ.254, 20-ம் நம்பர் ரூ.257, 24-ம் நம்பர் ரூ.267, 30-ம் நம்பர் ரூ.277, 34-ம் நம்பர் ரூ.288, 40-ம் நம்பர் ரூ.303 ஆக உள்ளது.

செமி கோம்டு ரகம் 16-ம் நம்பர் ரூ.244, 20-ம் நம்பர் ரூ.247, 24-ம் நம்பர் ரூ.257, 30-ம் நம்பர் ரூ.267, 34-ம் நம்பர் ரூ.280, 40-ம் நம்பர் ரூ.293 ஆக உள்ளது.

-------------------