மின்சாரம் பாய்ந்து மூதாட்டி பலி

வையம்பட்டி:

வையம்பட்டியை அடுத்த வெள்ளாளபட்டி அருகே உள்ள சுக்காம்பட்டியை சேர்ந்தவர் மீனாட்சியம்மாள்(வயது 65). இவர் நேற்று காலை இயற்கை உபாதையை கழிக்க சென்றார். இதற்கிடையே அந்த பகுதியில் நேற்று முன்தினம் இரவு வீசிய பலத்த காற்று மற்றும் இடி, மின்னல் மழையால் மின் கம்பி ஒன்று தாழ்ந்து தொங்கிக் கொண்டிருந்தது. இருள் சூழ்ந்து இருந்ததால் மின்கம்பியை கவனிக்காமல், அதனை மீனாட்சியம்மாள் கடக்க முயன்றபோது, அவர் மீது மின்சாரம் பாய்ந்து சம்பவ இடத்திலேயே உயிரிழந்தார். இந்த சம்பவம் பற்றி தகவல் அறிந்த வையம்பட்டி போலீசார் சம்பவ இடத்திற்கு சென்று இறந்தவரின் உடலை கைப்பற்றி பிரேத பரிசோதனைக்காக மணப்பாறை அரசு மருத்துவமனைக்கு அனுப்பி வைத்தனர். மேலும் இது குறித்து வழக்குப்பதிவு செய்து விசாரணை நடத்தி வருகின்றனர்.