கம்பத்தில்வைக்கோல் சுற்றும் எந்திரத்தை திருட முயற்சி:3 பேர் கைது

கம்பம் செல்லாண்டியம்மன் கோவில் தெருவை சேர்ந்தவர் பரமன் (வயது 55). வைக்கோல் வியாபாரி. இவர், வைக்கோல் சுற்றும் எந்திரத்தை கம்பத்தில், காமயகவுண்டன்பட்டி சாலையில் உள்ள தனியார் நெல் களத்தில் நிறுத்தி இருந்தார். நேற்று முன்தினம் அந்த எந்திரத்தில் உள்ள 7 ரோலர்களை 3 பேர் கொண்ட கும்பல் கழற்றி ஆட்டோவில் ஏற்றி செல்ல முயன்றனர். அப்போது அவர்களை பரமன் கையும், களவுமாக பிடித்து கம்பம் வடக்கு போலீசாருக்கு தகவல் கொடுத்தார்.

அதன்பேரில் சப்-இன்ஸ்பெக்டர் முனியம்மாள் (பொறுப்பு) தலைமையில் போலீசார் சம்பவ இடத்திற்கு விரைந்து வந்து 3 பேரையும் போலீஸ் நிலையத்திற்கு அழைத்து சென்று விசாரணை நடத்தினர். விசாரணையில், அவர்கள் கோம்பை சாலை தெருவை சேர்ந்த ஞானேசன் (45), சுங்கம் தெருவை சேர்ந்த சுல்தான் இப்ராஹிம் (51), முகமது ரபீக் (51) என்பதும், வைக்கோல் சுற்றும் எந்திரத்தில் உள்ள 7 ரோலர்களை திருடி சரக்கு ஆட்டோவில் கடத்தி செல்ல முயன்றது தெரியவந்தது. இதையடுத்து போலீசார் வழக்குப்பதிவு செய்து ஞானேசன், சுல்தான் இப்ராஹிம், முகமது ரபீக் ஆகிய 3 பேரையும் கைது செய்தனர். மேலும் திருட்டுக்கு பயன்படுத்திய ஆட்டோ, மோட்டார்சைக்கிள் பறிமுதல் செய்யப்பட்டது.