திருவாரூர் மாவட்டம் நீடாமங்கலத்தில் இருந்து ராஜபாளையம் மற்றும் தென்காசிக்கு அரவைக்காக தலா ஆயிரம் டன் வீதம் மொத்தம் 2 ஆயிரம் டன் நெல் அனுப்பி வைக்கும் பணி நடந்தது. இதை முன்னிட்டு நீடாமங்கலம், மன்னார்குடி, கூத்தாநல்லூர் ஆகிய தாலுகாக்களில் இயங்கிவரும் அரசு நேரடி நெல் கொள்முதல் நிலையங்களில் கொள்முதல் செய்யப்பட்ட நெல் மற்றும் மூவாநல்லூர், அசேஷம், தெற்குநத்தம், இடையர்நத்தம் ஆகிய ஊர்களில் உள்ள திறந்தவெளி சேமிப்பு மையங்களில் இருப்பு வைக்கப்பட்ட 2 ஆயிரம் டன் எடை கொண்ட பொதுரக நெல் 156 லாரிகளில் நீடாமங்கலம் ரெயில் நிலையத்திற்கு கொண்டு வரப்பட்டது. சுமைதூக்கும் தொழிலாளர்கள் நெல் மூட்டைகளை சரக்கு ரெயிலின் 42 பெட்டிகளில் ஏற்றினர். இதனைத் தொடர்ந்து நெல் அரவைக்காக ராஜபாளையத்திற்கு ஆயிரம் டன்னும், தென்காசிக்கு ஆயிரம் டன்னும் அனுப்பி வைக்கப்பட்டது.