பெண் கொலை வழக்கில் ஊராட்சி செயலாளர் உள்பட மேலும் 2 பேர் கைது

துவரங்குறிச்சி:

தூக்கில் பிணம்

திருச்சி மாவட்டம், துவரங்குறிச்சியை அடுத்த பில்லுப்பட்டியை சேர்ந்தவர் பெருமாள். இவரது மனைவி இளஞ்சியம்(வயது 46). இவர் கடந்த ஆகஸ்டு மாதம் 3-ந் தேதி அதே பகுதியில் உள்ள ஒரு மரத்தில் மர்மமான முறையில் தூக்கில் பிணமாக தொங்கியதாக கூறப்படுகிறது. இது குறித்து துவரங்குறிச்சி போலீசார் மர்ம சாவு என்பதன் அடிப்படையில் வழக்குப்பதிவு செய்து விசாரணை நடத்தி வந்தனர்.

இந்நிலையில் இளஞ்சியம் கொலை செய்யப்பட்டதாகவும், இதில் தொடர்புடைய குற்றவாளிகளை கைது செய்ய வேண்டும் என்றும் அவரது குடும்பத்தினர் தொடர்ந்து கோரிக்கை விடுத்து வந்தனர். மேலும் ஆர்ப்பாட்டமும் நடைபெற்றது. இதற்கிடையே இந்த சம்பவம் தொடர்பாக ஏற்கனவே சம்பவ இடத்தில் தடயங்கள் சேகரிக்கப்பட்டதுடன் விரல் ரேகைகளும் பதிவு செய்யப்பட்டது.

மேலும் 2 பேர் கைது

மேலும் சம்பவம் நடத்த இடத்தில் எந்தெந்த செல்போன்கள் பயன்பாட்டில் இருந்தது என்பது தொடர்பாகவும் போலீசார் ரகசிய விசாரணை மேற்கொண்டு வந்தனர். அதில் சிலரின் செல்போன்கள் தொடர்ந்து சம்பவம் நடந்த இடத்தில் குறிப்பிட்ட நேரத்தில் செயல்பட்டு வந்தது தெரியவந்தது. இதையடுத்து மாவட்ட போலீஸ் சூப்பிரண்டு சுஜித்குமார் உத்தரவின்பேரில் மணப்பாறை போலீஸ் துணை சூப்பிரண்டு ராமநாதன் தலைமையிலான போலீசார் விசாரணையை துரிதப்படுத்தினர். இதில் பில்லுப்பட்டியைச் சேர்ந்த சிவகாமி(42) என்பவர் கொலையாளிகளுக்கு பல்வேறு தகவல்களை அளித்ததாக தெரியவந்தது.

மேலும் இளஞ்சியம் கொலை செய்யப்பட்டது தெரியவந்ததையடுத்து, இந்த வழக்கில் கொலைக்கு உடந்தையாக இருந்த சிவகாமி, அழகர்சாமி மற்றும் பிச்சான் ஆகிய 3 பேரை ஏற்கனவே துவரங்குறிச்சி போலீசார் கைது செய்தனர். இந்நிலையில் இந்த கொலை வழக்கில் தொடர்புடைய ஊராட்சி செயலாளரான பில்லுப்பட்டியை சேர்ந்த ராமகிருஷ்ணன்(40) மற்றும் சின்னமணி(37) ஆகிய 2 பேரையும் துவரங்குறிச்சி போலீசார் கைது செய்தனர். இதுவரை இந்த கொலை வழக்கில் 5 பேர் கைது செய்யப்பட்டுள்ளது குறிப்பிடத்தக்கது.