வைகாசி மாத சஷ்டியையொட்டி முருகன் கோவில்களில் சிறப்பு பூஜை

பரமத்திவேலூர்:

பரமத்திவேலூர் வட்டாரத்தில் உள்ள முருகன் கோவில்களில் நேற்று வைகாசி மாத சஷ்டியையொட்டி சிறப்பு பூஜை நடந்தது. பிலிக்கல்பாளையம் ‌விஜயகிரி வடபழனி ஆண்டவர் கோவிலில் சிறப்பு பூஜை, வழிபாடு நடந்தது. இதையொட்டி சாமிக்கு பால், தயிர், சந்தனம் மற்றும் பல்வேறு திரவியங்களால் சிறப்பு அபிஷேகம் செய்யப்பட்டது. பின்னர் சாமி சிறப்பு அலங்காரத்தில் பக்தர்களுக்கு அருள்பாலித்தார். இதேபோல் கபிலர்மலை பாலசுப்பிரமணியசுவாமி கோவில், பிராந்தகத்தில் 34.5 அடி உயரத்தில் உள்ள ஆறுமுகக்கடவுள் கோவில், பாண்டமங்கலம் புதிய காசி விஸ்வநாதர் கோவிலில்‌ உள்ள சுப்ரமணியர், பொத்தனூர் அருகே உள்ள பச்சமலை‌ முருகன் கோவில், அணிச்சம்பாளையத்தில் உள்ள வேல் வடிவம் கொண்ட சுப்ரமணியர் கோவில், நன்செய்இடையாறு திருவேலீஸ்வரர் கோவிலில் உள்ள ‌சுப்ரமணியர், பேட்டை பகவதியம்மன் கோவிலில் உள்ள முருகன் ஆகிய கோவில்களில் சிறப்பு பூஜை நடந்தது. இதில் திரளான பக்தர்கள் கலந்து கொண்டு சாமி தரிசனம் செய்தனர்.