கைதி உருவாக்கிய சோலார் சைக்கிள்

கோவை

கோவை மத்திய சிறையில் சோலார் பேனல் மூலம் இயங்கும் சைக்கிளை கைதி ஒருவர் உருவாக்கி உள்ளார்.

தண்டனை கைதி

ஈரோடு மாவட்டம் கோபிச்செட்டிப்பாளையம் அருகே உள்ள கவுந்தபாடியை சேர்ந்தவர் யுகஆதித்தன் (வயது 31). இவர் ஏரோநாட்டிக்கல் என்ஜினீயரிங் படித்துள்ளார்.

இந்த நிலையில் யுக ஆதித்தன் கடந்த சில ஆண்டுகளுக்கு முன்பு சேலம் மாவட்டம் அழகாபுரம் போலீஸ் நிலைய எல்லைக்கு உட்பட்ட பகுதியில் நடந்த கொலை வழக்கில் கைது செய்யப்பட்டார். பின்னர் ஆயுள் தண்டனை விதிக்கப்பட்டு கடந்த 6 ஆண்டுகளாக கோவை மத்திய சிறையில் அடைக்கப்பட்டு உள்ளார்.

அவர் சிறையில் இருந்தபடியே தான் படித்த கல்வியை பயனுள்ளதாக்கும் வகையில் 'இ-சைக்கிள்' ஒன்றை உருவாக்கி உள்ளார். இந்த சைக்கிளை சூரிய ஒளியில் இருந்து மின்சாரம் பெறும் சோலார் பேனல் மூலம் இயக்கலாம். அல்லது பெடல்களை மிதிக்கும் போது டைனமோவில் இருந்து வரும் மின்சாரத்தை கொண்டு இயக்கலாம். அல்லது பேட்டரியில் சார்ஜ் ஏற்றிக்கொண்டும் இயக்கலாம். தற்போது அந்த சைக்கிளை சிறை வார்டன்கள் பயன்படுத்தி வருகின்றனர்.

இதுகுறித்து கோவை மத்திய சிறைத்துறை அதிகாரிகள் கூறியதாவது:-

சோலாா் சைக்கிள்

யுகஆதித்தன் சிறை வளாகத்துக்குள் ஏதாவது புதிதாக செய்ய வேண்டும் என முயற்சி மேற்கொண்டார். அப்போது சிறை வளாகத்தில் பயன்படுத்தாமல் கிடந்த சைக்கிளை பார்த்த அவர் அதனை சூரிய ஒளி மற்றும் பேட்டரியில் இயங்கும் வகையில் வடிவமைத்து உள்ளார். ஒரு மாதத்தில் இதனை தயார் செய்து உள்ளார். சைக்கிளின் நடுவில் தகடுகளை வைத்து அங்கு பேட்டரியை பொருத்தினார். மேலும் பேட்டரியை சார்ஜ் செய்வதற்காக டைனமோவையும் பொருத்தினார். சைக்கிளை மிதிக்கும்போது டைனமோ மூலமாக பேட்டரி சார்ஜ் ஏறும் வகையில் வடிவமைத்தார். மின்சாரம் மூலமாகவும் பேட்டரியை சார்ஜ் செய்யலாம்.

கேரியரில் சோலார் பேனலை பொருத்தி அதன் மூலமாகவும் சைக்கிள் இயங்கும் வகையிலும் வடிவமைத்து உள்ளார். ராணுவ வாகனத்துக்கு அடிக்கும் பச்சை நிறத்தில் பெயிண்ட் அடித்து எங்களிடம் வழங்கினார். யுகஆதித்தனை நாங்கள் வெகுவாக பாராட்டினோம். இந்த சைக்கிளை தற்போது சிறை வளாகத்தில் உள்ள டவர் பிளாக்கில் ரோந்து செல்லும் சிறை வார்டன்கள் பயன்படுத்தி வருகின்றனர். இதுபோன்று மேலும் 9 சைக்கிளை உருவாக்க திட்டமிட்டு உள்ளோம். தற்போது யுக ஆதித்தன் 'இ-ஆட்டோவை' உருவாக்கி வருகிறார். ஓரிரு மாதங்களில் இந்த பணி முடிவடையும். அதன் பின்னர் அந்த ஆட்டோவை சிறை வளாகத்தில் ரோந்து பணியில் பயன்படுத்த உள்ளோம்.

இவ்வாறு அவர்கள் கூறினர்.