இ-சேவை மையத்தில் குவிந்த பொதுமக்கள்

மத்திய, மாநில அரசுகளின் திட்டங்கள் மற்றும் மானியங்கள் பெறுவதற்கு ஆதார் அட்டை கட்டாயமாக்கப்பட்டு உள்ளது. மேலும் 1-ம் வகுப்பு முதல் 12-ம் வகுப்பு வரை படிக்கும் மாணவர்களுக்கு ஒரே எமிஸ் பதிவெண்ணை பராமரிக்க அனைத்து பள்ளிகளுக்கும் கல்வித்துறை உத்தரவிட்டுள்ளது. இந்த எமிஸ் பதிவெண்ணில் மாணவ-மாணவிகளின் ஆதார் எண்கள் பதிவேற்றம் செய்யப்படுகிறது. இந்த பதிவெண்ணில் உள்ள விவரங்கள் சான்றிதழில் அச்சிடப்படும் என்பதால், ஆதார் அட்டையில் உள்ள பெயர், பிறந்த தேதி, முகவரி, பெற்றோர் பெயர்களில் உள்ள திருத்தங்களை சரிசெய்வதற்காக ஏராளமானோர் இ-சேவை மையத்திற்கு சென்று, திருத்தி வருகின்றனர். அதேபோல் தமிழக அரசின் கலைஞர் மகளிர் உரிமைத்தொகை திட்டத்துக்கும் ஆதார் அட்டையில் உள்ள விவரங்களை, குறிப்பாக செல்போன் எண்ணை திருத்துவதற்காகவும் தற்போது ஏராளமானோர் இ-சேவை மையங்களுக்கு படையெடுத்து வருகின்றனர். இதனால் இ-சேவை மையங்களில் கூட்டம் அலைமோதுகிறது.

இந்தநிலையில் கம்பம் நகராட்சி அலுவலகத்தில் உள்ள இ-சேவை மையத்தில் நேற்று காலை 7 மணி முதலே ஏராளமானோர் குவிந்தனர். அவர்கள் தங்களது ஆதார் அட்டையில் விவரங்களை திருத்துவதற்காக வந்திருந்தனர். அதிலும் கைக்குழந்தையுடனும் ஏராளமானோர் வந்தனர். இ-சேவை மைய பணியாளர்கள் வந்தவுடன் பொதுமக்கள் வரிசையில் நிற்காமல் கூட்டமாக கூடினர். இதனால் அவர்களுக்குள் தள்ளுமுள்ளு ஏற்பட்டது. இதில், வயதானவர்கள், மாற்றுத்திறனாளிகள் அவதியடைந்தனர். இதையடுத்து அங்கிருந்த பணியாளர்கள் பொதுமக்களை சமரசம் செய்தனர். அதன்பிறகு இ-சேவை பணிகள் தொடங்கி நடைபெற்றன. இதுகுறித்து பொதுமக்கள் கூறுகையில், கம்பம் நகராட்சி அலுவலகத்தில் உள்ள இ-சேவை மையத்தில் மட்டுமே ஆதார் அட்டையில் திருத்தம் செய்யப்படுகிறது. இதனால் இங்கு கூட்டம் அதிகமாக காணப்படுகிறது. மேலும் நாள் ஒன்றுக்கு அதிகபட்சம் 40 நபருக்கு மட்டுமே பதிவேற்றம் செய்யப்படுகிறது. எனவே கூட்ட நெரிசலை தவிர்க்க சிறப்பு முகாம்களை நடத்த வேண்டும் என்றனர்.