முதல்-அமைச்சர் மு.க.ஸ்டாலினின் பொது வாழ்வு பயண புகைப்பட கண்காட்சி

திருவண்ணாமலை தூய்மை அருணை சார்பில் முதல்-அமைச்சர் மு.க.ஸ்டாலினின் பொது வாழ்வு பயண புகைப்பட கண்காட்சியை நடிகர் ஜெயம் ரவி திறந்து வைத்தார்.

புகைப்பட கண்காட்சி

தமிழ்நாடு முதல்-அமைச்சர் மு.க.ஸ்டாலினின் 70-வது பிறந்த நாளை முன்னிட்டு அவரது பொது வாழ்வு பயண புகைப்பட கண்காட்சி சென்னையில் தொடங்கி பல்வேறு மாவட்டங்களில் நடத்தப்படுகிறது.

அதன்படி திருவண்ணாமலை தூய்மை அருணை சார்பில் திருவண்ணாமலை காந்தி நகர் பைபாஸ் சாலை மைதானத்தில் குளிர்சாதன வசதியுடன் கூடிய அரங்கத்தில் அமைக்கப்பட்டு உள்ளது.

இந்த புகைப்பட கண்காட்சியில் முதல்-அமைச்சர் மு.க.ஸ்டாலினின் 70 ஆண்டு கால வாழ்க்கையில் அவர் சந்தித்த சவால்கள், மொழி, இனம், மக்கள் நலன் காக்க அவர் மேற்கொண்ட போராட்டங்கள், சிறை வாழ்க்கை துயரங்கள் ஆகியவற்றை இளம் தலை முறையினர் முழுமையாக அறிந்து கொள்ளும் வகையில் 200-க்கும் மேற்பட்ட புகைப்படங்கள் காட்சி படுத்தப்பட்டு இருந்தது.

மேலும் இயல்பான காட்சி வடிவங்கள் அமைக்கப்பட்டு இருந்தன. இந்த புகைப்பட க்கண்காட்சி வருகிற 17-ந் தேதி வரை காலை 10 மணி முதல் மதியம் 1 மணி வரையும், மாலை 4 மணி முதல் 8 மணி வரையும் நடைபெற உள்ளது.

நடிகர் ஜெயம் ரவி திறந்து வைத்தார்

இந்த புகைப்பட கண்காட்சியின் தொடக்க நிகழ்ச்சி இன்று மாலை நடைபெற்றது. பொதுப்பணித்துறை அமைச்சர் எ.வ.வேலு தலைமை தாங்கினார்.

துணை சபாநாயகர் கு.பிச்சாண்டி, அமைச்சர் செஞ்சி மஸ்தான், கலெக்டர் முருகேஷ், சி.என்.அண்ணாதுரை எம்.பி., பெ.சு.தி.சரவணன் எம்.எல்.ஏ., தூய்மை அருணை ஒருங்கிணைப்பாளர் டாக்டர் எ.வ.வே.கம்பன், இரா.ஸ்ரீதரன், பா.கார்த்திவேல்மாறன், பிாியா விஜயரங்கன் உள்ளிட்டோர் முன்னிலை வகித்தனர்.

இதில் சிறப்பு அழைப்பாளராக நடிகர் ஜெயம் ரவி கலந்து கொண்டு புகைப்பட கண்காட்சியை திறந்து வைத்து பார்வையிட்டார்.

பின்னர் அவர் கூறுகையில், திருவண்ணாமலைக்கு நான் பலமுறை வந்துள்ளேன். இந்த புகைப்பட கண்காட்சி சிறப்பான முறையில் அமைக்கப்பட்டு உள்ளது.

இது ஒரு கதை சினிமா போன்று இந்த புகைப்பட கண்காட்சி மூலம் ஒரு சகாப்தத்தை கண் முன்பு காண்பித்து உள்ளனர். முதல்- அமைச்சர் மு.க.ஸ்டாலின் சென்னை மேயராக இருந்ததில் இருந்து பல்வேறு சேவைகளை செய்து வருகிறார்.

சிறப்பான ஆட்சி

முதல்- அமைச்சரின் மனதை வெளிகாட்டும் விதமாகவும் இந்த புகைப்பட கண்காட்சி அமைக்கப்பட்டு உள்ளது. தமிழகத்தில் முதல்-அமைச்சர் சிறப்பான முறையில் ஆட்சி நடத்தி வருகிறார்.

பல நல்லவிதமான மாற்றங்கள் தமிழகத்தில் நடைபெற்று வருகிறது. இன்றும் பல நல்ல மாற்றங்கள் வர வேண்டும் என்று நான் ஆசைப்படுகிறேன். மேலும் திருவண்ணாமலை மக்கள் வரவேற்பு மிகவும் மகிழ்ச்சியாகவும், மனதிற்கு சந்தோஷமாகவும் உள்ளது.

இவ்வாறு அவர் கூறினார்.

நிகழ்ச்சியில் மாவட்ட வருவாய் அலுவலர் பிரியதர்ஷினி, தி.மு.க. மாவட்ட பொருளாளர் பன்னீர்செல்வம், மாவட்ட ஊராட்சிக்குழு தலைவர் பார்வதி சீனிவாசன், திருவண்ணாமலை நகரமன்றத் தலைவர் நிர்மலாவேல்மாறன், ஒன்றியக்குழு தலைவர்கள் கலைவாணி கலைமணி, பரிமளா கலையரசன், அன்பரசி ராஜசேகர், நடிகர் ஜோ.மல்லூரி, அருணை வெங்கட், தொழிலதிபர் ஜமாலுதின், வர்த்தக சங்க நிர்வாகிகள் தனக்கோட்டி, சண்முகம், மண்ணுலிங்கம், செந்தில்மாறன், ரெட் கிராஸ் இந்திரராஜன் மற்றும் பல்வேறு அமைப்பினர் உள்பட பலர் கலந்து கொண்டனர்.