சீறிப்பாய்ந்த மாட்டு வண்டிகள்

சிவகங்கை பிள்ளைவயல் காளியம்மன் கோவில் திருவிழாவையொட்டி நடந்த பந்தயத்தில் மாட்டு வண்டிகள் சீறிப்பாய்ந்தன.

பூச்சொரிதல் விழா

சிவகங்கை பிள்ளைவயல் காளியம்மன் கோவில் பூச்சொரிதல் விழாவையொட்டி மாட்டு வண்டி பந்தயம் சிவகங்கை-மதுரை சாலையில் நடைபெற்றது. இதில் மொத்தம் 70 வண்டிகள் கலந்துகொண்டு பெரியமாட்டு வண்டி பந்தயம், நடுமாட்டு வண்டி பந்தயம், சின்னமாட்டு வண்டி பந்தயம், பூஞ்சிட்டு வண்டி பந்தயம் என 4 பிரிவாக நடைபெற்றது.

முதலில் நடைபெற்ற பெரியமாட்டு வண்டி பந்தயத்தில் 13 வண்டிகள் கலந்துகொண்டு முதல் பரிசை ஜெய்ஹிந்த்புரம் அக்னிமுருகன் வண்டியும், 2-வது பரிசை திருச்சி செந்தில்பிரசாத் மற்றும் கொட்டாணிப்பட்டி சீமான் ஆகியோர் வண்டியும், 3-வது பரிசை பன்னைபுரம் சாஜாபிரதர்ஸ் வண்டியும் பெற்றது.

பரிசுகள்

பின்னர் நடைபெற்ற நடுமாட்டு வண்டி பந்தயத்தில் 14 வண்டிகள் கலந்துகொண்டு முதல் பரிசை பொன்பேத்தி மருதுபாண்டிய வல்லாத்தேவர் வண்டியும், 2-வது பரிசை கல்லுப்பட்டி மகாராஜா வண்டியும், 3-வது பரிசை சிங்கம்புணரி வைரவன் வண்டியும் பெற்றது. தொடர்ந்து நடைபெற்ற சின்ன மாட்டு வண்டி பந்தயத்தில் 23 வண்டிகள் கலந்துகொண்டு முதல் பரிசை நாட்டரசன்கோட்டை பழனி வண்டியும், 2-வது பரிசை கம்பம் ரகிம்ராவுத்தர் வண்டியும், 3-வது பரிசை கொன்னப்பட்டி மகாராஜா ரமேஷ் வண்டியும் பெற்றது.

இறுதியாக நடைபெற்ற பூஞ்சிட்டு வண்டி பந்தயத்தில் 20 வண்டிகள் கலந்துகொண்டு முதல் பரிசை அதிகரை வேங்கை சேர்வை வண்டியும், 2-வது பரிசை முத்துப்பட்டி பூவலிங்கம் வண்டியும், 3-வது பரிசை தமறாக்கி பஞ்சமுத்து வண்டியும் பெற்றது.

வெற்றி பெற்ற வண்டிகளின் உரிமையாளர்களுக்கு பரிசுகள் வழங்கப்பட்டன. முன்னதாக சீறிப்பாய்ந்து சென்ற மாட்டு வண்டிகளை சாலையோரம் நின்றிருந்த பார்வையாளர்கள் பார்த்து ரசித்தனர்.