கிணத்துக்கடவு

கிணத்துக்கடவு அருகே நெம்பர் 10 முத்தூரில் ரேக்ளா பந்தயம் நடைபெற்றது. இந்த போட்டியில் கிணத்துக்கடவு, கோவை, திருப்பூர், தாராபுரம், பொள்ளாச்சி, ஆனைமலை, உடுமலை, காங்கேயம், மற்றும் கேரளா உள்ளிட்ட பல்வேறு பகுதிகளில் இருந்து 200-க்கும் மேற்பட்ட காளை மாடு ஜோடிகள் கலந்து கொண்டன. இதில் 2 பல் காளைகளுக்கு 200 மீட்டர் தூரமும், 6 பல் காளைகளுக்கு 300 மீட்டர் தூரமும் நிர்ணயிக்கப்பட்டது.

ரேக்ளா போட்டியில் நிர்ணயிக்கப்பட்ட தூரத்தை கடக்க காளைகள் சீறிப்பாய்ந்து சென்றதை ஏராளமான பொதுமக்கள் பார்த்து ரசித்தனர். போட்டிகளில் வெற்றி பெற்ற காளைகளுக்கு பரிசளிக்கப்பட்டது. முதல் பரிசாக ஒரு பவுன் தங்க நாணயமும், 2-ம் பரிசாக 4 கிராம் தங்க நாணயமும், 3-ம் பரிசாக 2 கிராம் தங்க நாணயமும், 4-ம் பரிசு முதல் 10-ம் பரிசு வரை ஒரு கிராம் தங்க நாணயமும், 11-ம் பரிசு முதல் 20-ம் பரிசு வரை கோப்பைகளும் வழங்கப்பட்டன. போட்டியில் பங்கேற்ற மற்ற காளைகளுக்கு ஆறுதல் பரிசு வழங்கப்பட்டது. முன்னதாக ரேக்ளா பந்தயம் நடக்கும் பகுதியில் கிணத்துகடவு போலீஸ் இன்ஸ்பெக்டர் செந்தில்குமார் தலைமையில் போலீசார் பாதுகாப்பு பணியில் ஈடுபட்டனர்.