ஓதுவார் வீட்டில் ரூ.18 லட்சம் நகைகள் கொள்ளை

சிதம்பரம்

ஓதுவார்

கடலூர் மாவட்டம் சிதம்பரம் பள்ளிப்படை தில்லைகாளியம்மன் நகரை சேர்ந்தவர் முத்துக்குமரன்(வயது 40). ஓதுவாரான இவர் சிதம்பரம் இளமையாக்கினார் கோவில் தெருவில் தேவாரம் பயிற்சிப்பள்ளி நடத்தி வருகிறார்.

இந்த நிலையில் முத்துக்குமரன் கடந்த மாதம் 17-ந்தேதி வீட்டை பூட்டி விட்டு குடும்பத்துடன் விழுப்புரம் மாவட்டம் திருவெண்ணெய்நல்லூரில் நடைபெற்ற கும்பாபிஷேக விழாவிற்கு சென்றார். பின்னர் அவர் குடும்பத்துடன் அங்கிருந்து புறப்பட்டு நேற்று முன்தினம் இரவு வீட்டுக்கு வந்தார்.

நகைகள் கொள்ளை

அப்போது வீட்டின் முன்பக்க கதவின் பூட்டு உடைக்கப்பட்டு இருந்ததை கண்டு அதிர்ச்சி அடைந்த முத்துக்குமரன் உள்ளே சென்று பார்த்தபோது பீரோவின் கதவுகள் திறந்து கிடந்தன. அதில் இருந்த தங்க சங்கிலி, மோதிரம் உள்ளிட்ட 45 பவுன் நகைகள் மற்றும் 5 கிலோ வெள்ளி பொருட்களை யாரோ மர்ம நபர்கள் கொள்ளை அடித்து சென்றது தெரிந்தது. இதன் மதிப்பு ரூ.18¾ லட்சம் இருக்கும் என கூறப்படுகிறது.

பின்னர் இதுகுறித்து முத்துக்குமரன் சிதம்பரம் நகர போலீஸ் நிலையத்தில் புகார் கொடுத்தார். அதன் பேரில் குற்றப்பிரிவு போலீஸ் சப்-இன்ஸ்பெக்டர்கள் இளங்கோ, பாபு மற்றும் போலீசார் விரைந்து வந்து கொள்ளை நடந்த வீ்ட்டை பார்வையிட்டு அக்கம் பக்கத்தினரிடம் விசாரணை நடத்தினர்.

மர்மநபர்களுக்கு வலைவீச்சு

மேலும் கடலூரில் இருந்து மோப்ப நாய் கூப்பர் வரவழைக்கப்பட்டது. அது கொள்ளை நடந்த வீ்ட்டில் இருந்து எம்.ஐ. நகர் வரை ஓடி நின்றது. ஆனால் யாரையும் கவ்விப்பிடிக்கவில்லை.

தொடர்ந்து கைரேகை நிபுணர்களும் வரவழைக்கப்பட்டு பீரோ, கதவுகளில் இருந்த ரேகைகளை பதிவு செய்தனர்.

இதுகுறித்து போலீசார் வழக்குப்பதிவு செய்து நகைகளை கொள்ளையடித்துச்சென்ற மர்ம நபர்களை வலைவீசி தேடி வருகிறார்கள்.

ஓதுவார் வீ்ட்டின் பூட்டை உடைத்து ரூ.18¾ லட்சம் மதிப்புள்ள நகைகளை மர்மநபர்கள் கொள்ளையடித்துச்சென்ற சம்பவம் சிதம்பரத்தில் பரபரப்பை ஏற்படுத்தியுள்ளது.