நகை வியாபாரியிடம் ரூ.5 கோடி தங்கக்கட்டி மோசடி

நகை தொழில்

கோவையில் ஏராளமான தங்கநகை பட்டறைகள் உள்ளன. இங்கு தயாரிக்கப்படும் தங்கநகைகள் வெளிமாநிலங்கள், வெளி மாவட்டங்கள் மற்றும் வெளிநாடுகளுக்கு விற்பனைக்காக அனுப்பி வைக்கப்படுகிறது. நகை வியாபாரிகள், நகை செய்ய கொடுக்கும் தங்கத்தை மோசடி செய்யும் சம்பவங்கள் அடிக்கடி நடைபெற்று வருகின்றன.

ராஜஸ்தான் மாநிலத்தை சேர்ந்தவர் விகேஷ் ஜெயின் (வயது41). தங்க நகை வியாபாரி. இவர் கோவை வெரைட்டி ஹால் ரோடு போலீஸ் நிலையத்தில் ஒரு புகார் மனு அளித்தார். அதில் அவர் கூறியிருப்பதாவது:-

பட்டறை

நான் கடந்த 12 வருடங்களுக்கு முன்பு கோவைக்கு வந்தேன். சொக்கம்புதூரில் அடுக்குமாடி குடியிருப்பில் குடும்பத்துடன் வசித்து வருகிறேன். நான், கோவை இடையர் வீதியில் நகைப்பட் டறை நடத்தி வரும் மேற்குவங்காள மாநிலத்தை சேர்ந்த சேக் சலாம் அலி ஜமேதார் (39) என்பவரிடம் கடந்த 3 ஆண்டுகளாக நகை செய்வதற்காக தங்கக்கட்டிகளை கொடுத்து வருகிறேன்.

அவர்கள் செய்து கொடுக்கும் நகைகளை மும்பையில் விற்பனை செய்த வந்தேன். சேக்சலாம்அலி ஜமேதாரிடம் மேற்கு வங்காள மாநிலத்தை சேர்ந்த அஜய்துலா (20) என்பவர் நகை தொழிலாளியாக வேலை பார்த்து வருகிறார்.

மீட்டு தர வேண்டும்

கடந்த ஏப்ரல் மாதம் 1-ந் தேதி நான் மும்பை யில் உள்ள ஒரு நகைக்கடையில் இருந்து 11 கிலோ 473 கிராம் தங்க கட்டிகளை வாங்கி நகை செய்வதற்காக சேக் சலாம் அலி ஜமேதார் மற்றும் அஜய்துலா ஆகியோரிடம் கொடுத்தேன். ஆனால் அவர்கள் 541 கிராம் தங்கத்துக்கு மட்டும் ஆபரணங்களை செய்து கொடுத்தனர்.

பின்னர் அவர்கள் 2 பேரும் ரூ.5 கோடி மதிப்பிலான 10 கிலோ 340 கிராம் தங்கத்துடன் தலைமறைவாகி விட்டனர். எனவே அவர்களை கண்டுபிடித்து தங்கத்தை மீட்டு தர நடவடிக்கை எடுக்க வேண்டும். இவ்வாறு அதில் கூறப்பட்டு உள்ளது.

கைது

அதன் பேரில், வெரைட்டிஹால் ரோடு போலீசார் வழக்குபதிவு செய்து விசாரணை நடத்தி தங்க நகை தொழிலாளி அஜய்துலா என்பவரை கைது செய்தனர். அவரிடம் இருந்து 260 கிராம் நகைகளை மட்டும் போலீசார் மீட்டனர்.

நகை பட்டறை உரிமையாளர் சேக் சலாம் அலி ஜமேதாரை போலீசார் தேடி வருகின்றனர். அவர் மேற்குவங்காள மாநிலத் துக்கு தப்பிச்சென்று இருக்கலாம் என்று சந்தேகிக்கப்படுகிறது. எனவே அவரை பிடிக்க தனிப்படை அமைக்கப்பட்டு தீவிர தேடுதல் வேட்டை நடைபெறுகிறது.