சத்துணவு-அங்கன்வாடி ஓய்வூதியர் சங்கத்தினர் நூதன ஆர்ப்பாட்டம்

தேர்தல் அறிக்கையில் அறிவித்தப்படி அகவிலைப்படியுடன் கூடிய குடும்ப ஓய்வூதியம் ரூ.7,850 வழங்க வேண்டும். மருத்துவ படி, மருத்துவக்காப்பீடு, அகவிலைப்படி, பண பலன்கள் ஆகியவற்றை உடனே வழங்க வேண்டும். இலவச பஸ் பாஸ் வழங்க வேண்டும். மூத்தகுடி மக்களுக்கு ரெயிலில் கட்டண சலுகை வழங்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி வேதாரண்யம் கோட்டாட்சியா் அலுவலகம் முன்பு சத்துணவு-அங்கன்வாடி ஓய்வூதியர் சங்கத்தினர் தட்டு ஏந்தி ஆர்ப்பாட்டத்தில் ஈடுபட்டனர். ஆர்ப்பாட்டத்திற்கு வேதாரண்யம் சங்க ஒன்றிய தலைவர் ராமமூர்த்தி தலைமை தாங்கினார். இதில் அனைத்து துறை ஓய்வூதியா் சங்க மாவட்ட தலைவா் நடராஜன், தமிழ்நாடு அரசு ஊழியர் சங்கத்தை சேர்ந்த ராமமூர்த்தி, மாவட்ட பொருளாளா் போசன் உள்பட பலர் கலந்து கொண்டு பேசினர். தொடர்ந்து சங்க மாவட்ட துணைத்தலைவர் மதிவாணன் சிறப்புரையாற்றினார். இதில் பெண்கள் உள்பட ஏராளமானோர் கலந்து கொண்டு கோரிக்கைகள் குறித்த பதாகைகள் ஏந்தி கோஷங்கள் எழுப்பினர்.