புதுச்சத்திரம் அருகே அரசு பள்ளியில் அறிவியல் கண்காட்சி

நாமக்கல்:

புதுச்சத்திரம் அருகே உள்ள முத்துப்புடையாம்பாளையம் ஊராட்சி ஒன்றிய தொடக்கப்பள்ளியில் அறிவியல் கண்காட்சி நடந்தது. தலைமை ஆசிரியர் சுப்ரமணியன் தலைமை தாங்கினார். வட்டார கல்வி அலுவலர்கள் சந்திரசேகரன், சுப்பிரமணியன் மற்றும் ஆசிரியர் பயிற்றுனர் செல்வராணி ஆகியோர் முன்னிலை வகித்தனர். ஊராட்சி மன்ற தலைவர் நாகராஜன் கண்காட்சியை தொடங்கி வைத்தார். இதில் நீர் மேலாண்மை, இயற்கை பாதுகாப்பு, புவி வெப்பமாதலை கட்டுப்படுத்துதல், கழிவு நீர் சுத்திகரிப்பின் பயன்பாடு, காற்றாலை மின்சாரம் உள்பட பல்வேறு படைப்புகளை மாணவர்கள் காட்சிப்படுத்தி இருந்தனர். மாணவர்களின் படைப்பை தலைமை ஆசிரியர் மற்றும் ஆசிரியர்கள் பார்வையிட்டு விவரங்களை கேட்டறிந்தனர். மேலும் சிறந்த படைப்புகள் தேர்வு செய்யப்பட்டு பரிசுகளும் வழங்கப்பட்டன. இதில் பள்ளி மேலாண்மைக்குழு தலைவர் சண்முகப்பிரியா, தன்னார்வலர் பன்னீர்செல்வம் மற்றும் மாணவர்களின் பெற்றோர்கள் கலந்து கொண்டனர். முடிவில் ஆசிரியர் கண்ணன் நன்றி கூறினார்.