பள்ளி மாணவிகளுக்கு பாலியல் தொல்லை; அண்ணன்- தம்பி போக்சோவில் கைது

திண்டுக்கல் மாவட்டம் வேடசந்தூர் அருகே உள்ள கூம்பூர் ராமநாயக்கனூர் பகுதியை சேர்ந்தவர் பெருமாள். அவருடைய மகன்கள் ரங்கநாதன் (வயது 24), கருப்பசாமி (21). கூலித்தொழிலாளர்கள். இவர்கள் 2 பேரும் பக்கத்து ஊருக்கு சென்று சில நாட்கள் தங்கி இருந்தனர். அப்போது அங்கு 9 மற்றும் 5 வயதுடைய பள்ளி மாணவிகள் 2 பேருக்கு ரங்கநாதன், கருப்பசாமி ஆகியோர் பாலியல் தொல்லை கொடுத்ததாக தெரிகிறது. இதனால் மாணவிகள் உடல் சோர்ந்து காணப்பட்டனர்.

இதை பார்த்த மாணவிகளின் தாய், அவர்களை சிகிச்சைக்காக மருத்துவமனைக்கு அழைத்து சென்றார். அப்போது மாணவிகள் இருவரும் பாலியல் துன்புறுத்தலுக்கு ஆளாக்கப்பட்டது டாக்டர்களின் பரிசோதனையில் தெரியவந்தது. இதை கேட்டு மாணவிகளின் தாய் அதிர்ச்சி அடைந்தார். இதுகுறித்து வடமதுரை அனைத்து மகளிர் போலீஸ்நிலையத்தில் மாணவிகளின் தாய் புகார் கொடுத்தார்.

அதன்பேரில் போலீஸ் இன்ஸ்பெக்டர் சுமதி வழக்குப்பதிவு செய்து விசாரணை நடத்தினார். அதில் ரங்கநாதன் மற்றும் கருப்பசாமி ஆகிய இருவரும் மாணவிகளுக்கு பாலியல் தொல்லை கொடுத்தது உறுதியானது. அதனைத்தொடர்ந்து அண்ணன் ரங்கநாதன், தம்பி கருப்பசாமி ஆகியோர் மீது போக்சோ சட்டத்தின் கீழ் போலீசார் வழக்குப்பதிவு செய்து, அவர்களை கைது செய்தனர். பின்னர் அவர்கள் திண்டுக்கல் மாவட்ட சிறையில் அடைக்கப்பட்டனர்.